Búgin Úkimet otyrysynda Aýyl sharýashylyǵy mınıstri Saparhan Omarov kóktemgi egis jumystaryn ótkizý barysy jaıynda baıandady.
«2020 jyly aýyl sharýashylyǵy daqyldaryn 22,5 ga alańǵa egý josparlandy. Bul 2019 jylǵy deńgeıden 238 myń ga kóp. Bul rette ımporttyń ornyn basý úshin joǵary rentabeldi daqyldar paıdasyna egis alańdarynyń qurylysyn ártaraptandyrý máselesine erekshe nazar aýdarylady. Osylaısha osy jyly maıly daqyldardyń alańy 122,2 myń gektarǵa, kókónis daqyldarynyń alańy 10 myń gektarǵa, baqsha daqyldarynyń alańy 1,5 myń gektarǵa, kartop alańy 7,8 myń gektarǵa, azyqtyq daqyldardyń alańy 308,6 myń gektarǵa, qant qyzylshasynyń alańy 2,4 myń gektarǵa ulǵaıady», - dedi Saparhan Omarov.
Onyń aıtýynsha dándi daqyldar alańy 14,9 mln gektardy quraıdy. Bul ótken jylmen salystyrǵanda 191,6 myń gektarǵa kem.
«Bul egin alqaptaryn dıversıfıkasııalaý boıynsha qoıylǵan maqsattarǵa tolyǵymen sáıkes keledi. Qazirgi ýaqytta aýyl sharýashylyǵyn egý respýblıkanyń barlyq aımaqtarynda júrgizilýde. Atap aıtqanda dándi jáne burshaqty daqyldy 9,6 mln gektarǵa nemese josparlanǵan alańnyń 65 paıyzyna, maıly daqyldar 2,3 mln gektarǵa nemese 76 paıyzyna, kókónis baqsha daqyldary men kartop 400 myń gektarǵa nemese 85 paıyzǵa, qant qyzylshasy 20,5 gektarǵa nemese 93 paıyzǵa egildi», - dedi ol.
Mınıstrdiń atap ótýinshe, ońtústik óńirde, sondaı-aq Aqtóbe, Atyraý oblystarynda egin jumystary aıaqtalýǵa jaqyn.
«Qazgıdromettiń boljamyna sáıkes mamyrdyń úshinshi onkúndigi jańbyrly bolady dep kútilýde. Ásirese bul Qostanaı, Batys Qazaqstan, Aqmola, Soltústik Qazaqstan, Shyǵys Qazaqstan jáne Pavlodar oblystaryna qatysty», dedi ol.