FIFA men Qazaqstan fýtbol federasııasy jas daryndy oıynshylardy anyqtap, ári qaraı damytatyn erekshe baǵdarlamany júzege asyrmaq. Bul týraly Qazaqstan fýtbol federasııasy habarlady.
FIFA mamandary men Qazaqstan fýtbol federasııasynyń Tehnıkalyq ortalyǵynyń jetekshileri qatysqan onlaın-konferensııada Talent Development – Football Ecosystem Analysis baǵdarlamasyn iske qosý joldaryna toqtaldy.
Aýqymy keń baǵdarlamanyń jetekshisi – aty álemge tanymal bapker, qazirgi tańda Fýtbol qaýymdastyqtarynyń halyqaralyq federasııasynyń qyzmetkeri Arsen Venger. Birneshe jyldan beri ol FIFA-nyń álem fýtbolyn damytý bólimin basqardy.
«Baǵdarlama arqyly ár bala óziniń sheberligin kórsete alady. Kóptegen elde ulttyq quramaǵa basa nazar aýdarady. Ulttyq quramanyń oıyny eldegi fýtboldyń damý deńgeıine áser etetini anyq. Alaıda, jetistikke bári birdeı jete bermeıdi. Eýropa men álemniń basqa elderindegi fýtboldyń arasynda úlken aıyrmashylyq bar. Jas daryndardy anyqtap, olardyń ósýin qamtamasyz etýge baǵyttalǵan jobalar ǵana jaǵdaıdy retteı alady», dep málimdedi FIFA-nyń fýtboldy damytý bóliminiń basshysy Arsen Venger.
Arsen Vengerdiń Talent Development – Football Ecosystem Analysis baǵdarlamasynda Raımondas Statkıavıchýs jáne Edvınas Eımontastan basqa da kóptegen myqty mamandar bar. Olardyń arasynda AQSh áıelder quramasyn jattyqtyrǵan Eıprıl Haınrıhs pen Anglııa quramasynyń bas bapkeriniń mindetin atqarǵan Stıv Maklaren bar.
«Jobanyń mindeti – fýtbol mektepteriniń daryndy tárbıelenýshilerin anyqtap, olardy damytý úshin qolaıly jaǵdaı jasaý. Baǵdarlam eń aldymen qazaq fýtbolyn zertteıdi. Daryndy jastardyń sheberligin arttyrý men tárbıeleý joldary, seleksııa men ınfraqurylym máselelerin tolyq uǵyný kerek. Ár ulttyq qaýymdastyqpen jeke jumys júrgizemiz. Jastardy damytý joly keıbir elderde uqsas bolyp keledi. Keı jaǵdaıda daryndy jastardy ártúrli sebeptermen kózge ilinbe qalyp jatady. Osyndaı jaǵdaılardy azaıtýǵa tyrysamyz», deıdi FIFA sarapshysy Edvınas Eımontas.
«Jas talanttardy izdeý úsh negizgi bólimnen turady. Daryndy tárıbelenýshilerdi anyqtaý, olardyń ortasyn qalyptastyrý jáne jumysqa kásibı biliktiligi joǵary bapkerlerdi qabyldaý. Baǵdarlama ár eldegi úmiti bar oıynshylardy damytý maqsatynda júzege asyrylady. Zertteý jumystarynyń aýqymy keń. Taldaý! Nátıje! Fýtboldyń deńgeıin kóterýdi qamtamasyz etý úshin ulttyq fýtbol qaýymdastyqtarymen belsendi yntymaqtastyq kútip tur», dep atap ótti Stıv Maklaren.
FIFA-nyń resmı málimeti boıynsha, Talent Development – Football Ecosystem Analysis baǵdarlamasyna negizgi krıterııler boıynsha iriktelip alynǵan fýtbol mektepteri enedi:
- Oqý-jattyǵý jıynyn júrgizý úshin jeke nemese uzaq merzimdi jalǵa alynǵan turaqty sport ǵımaratynyń bolýy;
- Qazaqstannyń ártúrli jasóspirimder quramasyna shaqyrtý alǵan oıynshylar sanynyń kóptigi;
- Kem degende úsh jas ereksheligi boıynsha tárbıelenýshiler toby bolýy qajet. Onyń bireýi 17 jasqa deıingi jasóspirimder quramasynyń kategorııasyna sáıkes kelýi tıis;
- Shtatta kem degende úsh bapker bolýy qajet;
- Dırektor basqa klýbta nemes ózge qyzmette bolmaýy tıis;
- Ulttyq qaýymdastyq uıymdastyratyn balalar men jasóspirimder arasyndaǵy jarystarǵa turaqty qatysýy qajet.
«FIFA-nyń jahan fýtbolyn damytý bólimin basqaratyn Arsen Vengerdiń fýtbolshylarmen jeke jumys isteı alatyn keremet maman ekenin bilemiz. Ásirese, daryndy jastardyń jolyn taba alady. Bedeldi mamannyń tájirıbesi arqyly usynylǵan baǵdarlamanyń mańyzy zor. Ár elge arnalǵan jobanyń tabysty júzege asyrylatynyna senim mol», deıdi Qazaqstan fýtbol federasııasynyń bas hatshysy Azamat Aıtqojın.