Qaraǵandy oblysynyń ákimi Jeńis Qasymbek óńirdegi iri kásiporyndar basshylarymen sanıtarlyq-epıdemıologııalyq talaptardyń saqtalýyn baqylaý jáne óndiriste indet taralýynyń aldyn alý taqyryby boıynsha onlaın-keńes ótkizdi.
Bul áńgimege oblystaǵy «Nurqazǵan» kenishiniń qyzmetkerleri arasynda koronavırýs ınfeksııasynyń boı bermeı órshýi sebep boldy. Atalǵan jaǵdaıǵa qatty alańdaǵan oblys basshylyǵy kásiporyndar basshylarynan sanıtarlyq-epıdemıologııalyq normalardyń saqtalýyn muqııat qadaǵalaýdy talap etti.
Oblys ákimi Jeńis Qasymbek «Nurqazǵan» kenishindegi ókinishti jaǵdaıdyń basqa ónerkásiptik kásiporyndarda qaıtalanbaý kerektigine basa mán berdi
– Sizder kenishtegi jaǵdaıdyń sanaýly kún ishinde búkil oblystaǵy jalpy aýrýshańdyq ahýaldy qıyndatyp jibergenin kórdińizder. Qazir kenishtegi jumys toqtatylǵan, biraq bizde jumysyn toqtatýǵa bolmaıtyn kásiporyndar bar. Sondyqtan, sanıtarlyq-epıdemıologııalyq normalardyń saqtalýyn muqııat qadaǵalaý kerek. Densaýlyq saqtaý basqarmasy men bas sanıtarlyq dáriger beretin usynystardy eskerý qajet, – dedi ol.
Qazirgi tańda óńirdegi barlyq kásiporyndar kúsheıtilgen sanıtarlyq tártipke kóshken. Qyzmetkerlerdi maskalarmen jáne qolǵaptarmen qamtamasyz etý, úı-jaılardy antıseptıkalyq eritindilermen óńdeý, jeke zattarǵa arnalǵan shkaftardy olardyń arasyndaǵy qashyqtyq keminde bir jarym metr bolatyndaı etip ornalastyrý sııaqty talaptardy buljytpaı oryndaý qatań túrde qadaǵalanady. Zaýyttardaǵy as bloktary da basqasha jumys isteı bastady. Adamdar kezekti qalyptastyrmaý úshin ózine-ózi qyzmet kórsetý rejimin alyp tastalyndy. Keıbir mekemelerde ashanada túski as lanchbokspen almastyryldy.
Aýysym bastalar aldynda óńirdiń barlyq kásiporyndarynda qyzmetkerlerdiń temperatýrasy ólshenedi. Bul talaptar merdigerlerge de qatysty. Mysaly, GRES-Toparda olardan koronavırýs ınfeksııasyna tekserilý úshin PTR-taldaýdan ótý talap etiledi.
«GRES-Topar» JShS dırektory Evgenıı Nıkıtın rezervtik jospar retinde kazarmalyq rejimge kóshýdi qarastyryp jatqandaryn baıandady.
– Bizge jumysty qandaı jaǵdaıda da toqtatýǵa bolmaıdy. Sondyqtan, qajettilik týyndasa, qyzmetkerler jumystan soń úılerine qaıtpaı, arnaıy qarastyrylǵan úı-jaılarǵa ornalastyrylatyn bolady. Mundaı sharalar ınfeksııanyń taralýyn toqtatýǵa jáne baılanysýshylar sanyn qysqartýǵa kómektesedi, – dedi ol.
Qazirgi tańda kásiporyn basshylary qyzmetkerlerin KVI-ǵa testileýge erekshe kóńil bóle bastady. Mysaly, «ArselorMıttal Temirtaý» kompanııasy PTR-taldaý júrgizý úshin «Olımp» klınıkalyq-dıagnostıkalyq zerthanasymen shart jasasqan.
– Qazir biz úshin erekshe másele – qyzmetkerlerdiń jumys oryndaryna kelýin, olardyń shahtaǵa ketýin jáne túsýin baqylaý. Atap aıtqanda, bul áleýmettik qashyqtyqty saqtaý, maskalyq rejim, kólik pen úı-jaılardy dezınfeksııalaý. Munyń bári bizde saqtalady, degenmen qyzmetkerlerge únemi baqylaý men nusqaý jasap otyrý qajet, – dedi «ArselorMıttal Temirtaý» AQ Kómir departamentiniń dırektory Andreı Chernomaz.
Jeńis Qasymbek onlaın-jıyn barysynda mamandardyń boljamy boıynsha, indettiń qaıtalanýy elimizde osy jyldyń qyrkúıek-qazan aılarynda bolýy múmkin ekenin tilge tıek etti. «Iаǵnı, mundaı jaǵdaı jumys josparyn qaıta qurýdy talap etedi», dep atap ótti ol.
Jıyn sońynda Jeńis Qasymbek Qaraǵandy oblystyq densaýlyq saqtaý basqarmasynyń basshysyna mindetti medısınalyq saqtandyrý qorynan qala quraýshy kásiporyndardyń qyzmetkerleri úshin COVID-19 skrınıngterin qarjylandyrý múmkindigin qarastyrýdy tapsyrdy.
Qaraǵandy oblysy