Maýsym aıynyń basynda Temirtaý men Jezqazǵan qalalarynda koronavırýs ınfeksııasyn anyqtaıtyn PTR-zerthanalardyń ashylatynyn oblys ákimi Jeńis Qasymbek málimdedi.
Jergilikti Saryarqa telearnasynyń tikeleı efırinde sóılegen sózinde ol mundaı zerthanalar ashýdy oblystyń barlyq iri jumys berýshileri de qolǵa alýy kerektigin aıtty.
– Áleýmettik azamattyq jaýapkershilik tanytyńyzdar, qyzmetkerlerińizdiń densaýlyǵyna qamqorlyq jasańyzdar jáne qyzmetkerlerińizdi testileý úshin kóshpeli zerthanalardyń jumysyn uıymdastyryńyzdar. Bul óz kezeginde vırýs anyqtalǵan jaǵdaıda taralý tizbeginiń jolyn kesýge múmkindik beredi, al der kezinde bastalǵan emdeý aýrýdyń aýyr túrine kóshýine jol bermeıdi, – dedi Jeńis Qasymbek.
Búginde mundaı zerthana tek Qaraǵandy qalasynda ǵana jumys isteıdi. Onyń qýaty táýligine 1 200 adamǵa test jasaýǵa ǵana jetedi.
«ArseloMıttal Temirtaý» kompanııasy Temirtaýda zerthana ashý úshin «Olımp» klınıkalyq-dıagnostıkalyq zerthanasymen shart jasasty. Sátin salsa, munda kún saıyn myńdaǵan test ótkiziletin bolady.
Jezqazǵanda qýaty táýligine 500 test bolatyn PTR-zerthanasyn iske qosý josparlanǵan. Oǵan qajetti qural-jabdyqtar «Qazaqmys» korporasııasynyń esebinen satyp alyndy. Mundaı zerthanany Balqash qalasynda da ashý josparda bar.
Qazirgi tańda kúnnen kúnge órship bara jatqan koronavırýstyń saldarynan medısına salasyndaǵy máselelerge tyń kózqaraspen qaraý qajettigi týyndady. Mysaly, búginde Qaraǵandy oblysynda aýrýhanalar men emhanalar qarqyndy túrde jańǵyrtylýda. Ǵımarattar ishinde qosymsha ınfeksııalyq bólimsheler ashý úshin qaıta josparlaý júrgiziledi, tósekterdiń sany arttyrylady. Oblysta ınfeksııalyq qyzmetti qalpyna keltirý jáne damytý boıynsha óńirlik jospardy júzege asyrý kózdelgen.
Bıylǵy jyldyń qarasha aıyna deıin oblystyq bıýdjetten 905 mln teńge bólip, jeti nysandy qalpyna keltirý jáne jańǵyrtý josparda bar. Infeksııalyq bólimshelerdi qosymsha jabdyqtaýǵa 400 mln teńge qarastyrylǵan.
Jeńis Qasymbek oblystaǵy klınıkalyq epıdemıologtardyń barlyǵy kásibı deńgeılerin mindetti túrde arttyrýlary kerek dep sanaıdy. Sonda ǵana oblysta zamanaýı standarttarǵa jaýap beretin, bilikti mamandarmen qamtamasyz etilgen ınfeksııaǵa qarsy qaýipsizdiktiń myqty ınfraqurylymy qurylatynyn atap ótti ol.