Oblystaǵy sút óńdeý nysandary 67 prosent qana shıkizatpen qamtylyp otyr. Qazir osy olqylyqtyń ornyn toltyrýǵa umtylys jasalyp otyr.
Oblystyq aýyl sharýashylyǵy basqarmasynyń málimdeýinshe, aldaǵy úsh jylda bul olqylyqtyń orny toltyrylady. Taıaýda Zerendi aýdanyndaǵy «Mılk prodjekt» seriktestigi 300 basqa arnalǵan sharýashylyq nysanynyń qurylysyn aıaqtap, Eýropadan golshteın-frız tuqymdy mal aldyrdy. Golshteın-frız tuqymy jylyna 9-10 myń lıtr sút beredi. Sharýalar bul sıyrlardyń jergilikti aýa raıyna beıimdiligin, ónimdiligin joǵary baǵalaıdy. Nıderlandtyq asyl tuqymdy malǵa tıisinshe jaǵdaı jasalýda. Sút fermasy standartqa saı jabdyqtalǵan.
– Ákelingen mal eki-úsh aıdan soń buzaýlaıdy. Keıin sút óndirisine kirisemiz. Budan bólek taǵy eki júz bas mal satyp alamyz. Júz sıyr Gollandııadan ákelinedi, – deıdi seriktestik dırektory Iýrıı Shves.
Shetelden ákelingen asyl tuqymdy mal basyna 225 myń teńge sýbsıdııa bólinedi. Aldaǵy ýaqytta bul qoldaý kólemi 400 myńǵa deıin artady dep kútilýde. Bul nysan óńirdegi sút klasterin damytýǵa alǵashqy qadam. Zerendide budan bólek taǵy 4 ferma salynbaq.
– Bul kompanııa Sadovoe aýyldyq okrýginde osyndaı taǵy bir ferma salýdy josparlap otyr. «Molochnaıa reka» kompanııasy Bulaq aýyldyq okrýginde sút fermasyn salýǵa qyzyǵýshylyq bildirýde. «Aqjaıyq» kásiporny men «Bereket-2050» seriktestigi de sút óndirisimen aınalysýǵa bet buryp otyr. Memleket bul baǵytta úlken qoldaý kórsetip jatyr, – deıdi Zerendi aýdanynyń ákimi Baýyrjan Ǵaısa.
Aq molaısa, sút zaýyttary da tolyqqandy jumys ister edi. Sharýanyń qolyndaǵy birer sıyrdyń sútin jınap alý máselesi oń jolǵa qoıylsa, óńdeýshi kásiporyndar shıkizattan taryqpaıtyndyǵyn taǵy da eskergen jón.