Sport keshenderi qoljetimdi bolýy tıis

Ázirshe úkimet sporttyq is-sharalardy ótkizýge, jabyq keshende jattyǵý jumystaryn jasaýǵa ruqsat bergen joq. Eger sport ǵımarattary ashylar bolsa, turǵyndardyń sport keshenderine aǵylatyny ras. Sondyqtan da elde sport zaldaryna degen suranys artady. О́ńirlerdegi sport ǵımarattaryn aıtpaǵannyń ózinde elordadaǵy keshender qanshalyqty talap­qa saı? Sportpen shuǵyl­da­namyn degen árbir astanalyq turǵynǵa qoljetimdi me?

Jalpy Elbasy Nursultan Nazarbaev ta, Prezıdent Qasym-Jomart Toqaev ta ózderiniń ár Joldaýynda únemi buqaralyq sportty damytý kerektigin basa aıtyp, osy salaǵa jaýap­ty mınıstr­likke, qala, oblys ákim­derine naqty tapsyrmalar berip keledi. Máselen, Qasym-Jomart Kemeluly 2019 jyl­dyń 2 qyrkúıegindegi «Syn­dar­ly qoǵamdyq dıalog – Qazaq­stannyń turaqtylyǵy men ór­ken­deýiniń negizi» atty Jol­daý­ynda elimizde buqaralyq sportty damytýǵa baılanysty keshendi baǵdarlama qabyldaý kerektigin jetkizdi. «Ult den­saý­lyǵyn bekemdeý máselesi de óte ózekti. Barlyq jas sanat­tary arasynda buqaralyq sport túrlerin nasıhattaı berý kerek. Balalar úshin sporttyq ınfra­qurylymnyń barynsha qol­jetimdi bolýyn qamtamasyz etý kerek. Buqaralyq sportty damy­tý – pıramıdaǵa aınalýy tıis. Onyń basyna chempıondar shyqsa, onyń negizinde biz saý ári sanaly urpaqty, myqty ult­ty qalyptastyramyz. Bul ba­ǵyt­ty zańnamalyq turǵyda jalǵas­tyryp, buqaralyq sportty damytýda keshendi baǵdarlama qa­byl­daý kerek», dedi Memleket bas­shysy Qazaqstan halqyna Jol­daýynda.

       Kollajdy jasaǵan Qonysbaı ShEJIMBAI, «EQ»

Osy maqsatta elordamyzda jyl saıyn ártúrli sport alańdary salynyp, turǵyndar ıgili­gine berilýde. Sonymen qatar sa­lamatty ómir saltyn nasıhat­taý maqsatynda, jastardy sportqa baýlý úshin elordada kóp­shilikke arnalǵan saıystar men sporttyq festıvaldar jıi ótkizilip turady. Búginde bas qalada eresekterge de, bala­larǵa da sportpen shuǵyldanýǵa arnalǵan irili-usaqty 600-den astam sport nysany jumys istep tur.

Sonyń biri – «Astana» sport kesheni. Bul sport nysany qala turǵyndaryna basseın men jattyǵý zalyn usynady. So­nymen qatar balalar skalodrom, fýtbol jáne basketbol men voleıbol úıirmelerine jazylyp, úlkender jaǵy oıyn alańdaryn jalǵa alyp, jattyǵýlaryna bolady. Sporttyq seksııalardan kıkboksıng, karate, boks jáne taǵy basqa úıirmeler jumys isteıdi.

Sport kesheninde jattyǵý men basseın zaly bar. Balalar úshin jattyǵý zalyna jazylý aıyna orta eseppen 4500 teńge bolsa, eresekter úshin 8 500 teńge. Júzý basseıninde balalar toppen jattyqsa aıyna 13 000 teńge, al jekeleı jat­tyq­sa 18 000 teńge tóleıdi. Úlken­der úshin toppen jattyǵý 18 000 teń­ge, jekeleı jattyǵý úshin 20 000 teńge.

2011 jyly paıdalanýǵa be­ril­­gen respýblıkalyq «Sary­arqa» velotregi – veloshabandoz shlemi túrinde jasalǵan, erekshe sport ǵımaraty, álemdegi eń úzdik sport keshenderiniń biri re­tinde tanylǵan. Velotrektiń ishine jattyǵý zaly, trek, muz syr­ǵa­­naǵy, taekvondo, gımnastı­ka, oıyn zaly jáne shaǵyn fýtbol alań­dary kiredi. Jattyǵý zalyna 5 jasqa deıingi balalarǵa kirý tegin. Al mektep oqýshylaryna, stýdentterge jáne zeınetkerlerge bir jolǵy kelýge 50 paıyz je­ńildik qarastyrylǵan.

 «Saryarqa» kesheninde bas­seı­ing­e tú­sý úshin eresekterge arnalǵan top­tyq sabaq 18 000 teńge (aptasyna 3 ret), al bala­lar­ǵa arnalǵany 15 000 teńge (aptasyna 3 ret). Sondaı-aq osy ba­ǵaǵa jattyǵý zalyna da kire alasyz. Ve­losport jáne begovel seksııalaryna ja­zylýdyń bir rettik quny – 2 000 teńge bolsa, toppen jattyǵý aıyna 22 myń teń­gege deıin. Taekvondo sportyn jeke úı­renemin degenderge – 25 000 teńge (12 sabaq), toppen jattyǵamyn degenderge – 10 000 teńge (aptasyna 3 ret). Sonymen qatar 4-5 jastaǵy qyzdar kórkem gımnas­tı­kamen de aınalysa alady.

«Alaý» muzaıdyny Nur-Sultan turǵyndary jaz me­z­gi­lin­de de sportpen shuǵyl­da­ný úshin ortalyq ashqan. Muzaı­dyn saraıy qysqy ýaqytta sport- súıer qaýymǵa mynadaı qyzmet túrlerin usynady: konkımen syrǵanaý (hokkeı alańy), rolıkpen syrǵanaý (400 metrlik konkımen júgirý joly), al jazda batýt, ústel tennısi, badmınton, bılıard jáne shaǵyn golf. Bir kúndik tolyq bılettiń baǵasy – 1000 teńge, al jeńildik bıleti – 500 teńge. Sonymen qatar 7 jasqa deıingi balalarǵa, I jáne II top múgedekteri, kóp balaly otbasynan shyqqan, kámeletke tolmaǵan balalar jáne balalar úıleriniń tárbıelenýshilerine keshenge kirý tegin. Oqytýshylar, stýdentterge jeńildik bıleti qarastyrylǵan.

Qajymuqan Muńaıtpasov atyn­­d­aǵy stadıonnyń esigi jaz maý­­­­symynda jeńil atletıka men fýtbolǵa áýes jan­dar­ǵa árda­ıym ashyq. Kez kelgen qala tur­ǵyny jeńil atletıka jáne fýt­bolmen tegin aınalysa alady. Q.Muńaıt­pasov atyndaǵy orta­lyq sta­dıo­nda halyqaralyq stan­dart­qa sáıkes (105h68m) tabıǵı kógaldy fýtbol alańy bar jáne ol 12 250 oryndy trı­­býnamen jabdyqtalǵan. Fýt­bol­dan bas­qa, stadıonda 400 metrlik júgirý joly, uzyn­dyq­qa, bıiktikke sekiretin arnaıy oryndar bar.

Ishki ister mınıstrligine qaraıtyn «Alataý» sport kesheni qala tur­ǵyn­da­ry­na olımpııalyq basseın, júgirý joly, eki shaǵyn fýtbol, voleıbol alańy, bir­ne­she jekpe-jek sport túrleri, jat­ty­ǵý zalyn jáne birqatar bı úıirmeleri qyz­metin usynady. Máselen, bir saǵat bas­seınge túsý úshin eresekterge – 1 200, 15 jasqa deıingi balalarǵa – 650 jáne stý­dentterge – 800 teńge. Al jattyǵý zalyna kirýdiń bir rettik júgirý jolaǵyn qosa eseptegende quny (2 saǵat) eresekterge – 1 250, 16 jasqa deıingilerge – 800 jáne stýdentterge – 900 teńge. Sonymen qatar 1 saǵat ústel tennısimen shuǵyldanǵyńyz kelse – 950 teńge, bir saǵatqa fýtbol alańyn kúndizgi ýaqytta jaldaǵyńyz kelse – 20 000, keshki ýaqytqa 25 000 teńgeńiz bolýy kerek. Al voleıbol alańyna kúndiz 15 myń, keshki ýaqytqa 17 myń teńge tóleısiz.

«Dáýlet» sport kesheninde úl­ken tennısten dárister júrgi­zi­ledi. Bú­gin­de elimizdegi eń úl­ken tennıs or­ta­­­lyǵynda balalar jekeleı jáne top bo­lyp jattyǵady. Bul jerde ten­nıs­tiń álippesin úıretýden bastap, túr­li jarystarǵa daıyndap shyǵarady. Sondaı-aq qala turǵyndary qa­la­ǵan ýaqytynda kortty jalǵa ala alady.

Sport keshenderi úshin standartty júzý, fıtnes, dzıýdo, aıkıdo, djıý-djıtsý, ózin ózi qorǵaý sııaqty sport túrlerimen «Qazaqstan» sport saraıynda aınalysýǵa bolady. Júzý úıir­me­­sine bir aı qatysý úshin mektep ja­syn­daǵy balalar men stýdentterge 5000 teńge, al úlken­der­ge 10 000 teńge kóle­minde aqy bel­gilengen. Bulshyq eti­ńizdi da­mytyp, deneńizdiń symbatty bolýyn qalasańyz jáne áde­mi beı­ne­leýshi qozǵalystar úı­ren­gińiz kel­se fıtnes stýdııasyna jazylýǵa bolady. Baǵasy – 7 myń teńge. Balalardy bı toptaryna qabyldaý 4, 5 jas­tan júr­gi­ziledi. Bı úıirmesinen shyǵys, álem halyqtarynyń, balalar, klýbtyq bıler, strıp plastıka, BreakDance, ıoga, shoý balet (saltanatty keshterde bıleý) bıin úırene alady. Aılyq baǵasy 10 000 teńge shamasynda. «Qazaqstan» sport kesheni búginde elordanyń sporttyq jáne qoǵamdyq ómirinde mańyzdy ról at­qarady. Degen­men, qazirgi tańda atal­ǵan sport kesheninde rekonstrýksııa júr­gi­zilip jatyr.

Sondaı-aq sý sporty túr­le­rine áýes jan­dar júzý, sýǵa se­ki­rý, akademııalyq esý, baıdarka men kanoe esý, jelkendi sportqa mamandandyrylǵan «Tol­qyn» sport mektebine barýyna bolady. Biraq qazirgi ýa­qyt­ta bul sport kesheninde de aý­qymdy rekonstrýksııa júrgizý jos­par­lanǵan.

Mine, elorda turǵyndary sport­shy­lar men halyq ıgiligi úshin salynǵan sporttyq ǵıma­rat­tardy óz ıgilikteri úshin osylaısha paıdalana alady. Sondaı-aq qazirgi tańda Nur-Sultandaǵy ár turǵyn úı kesheniniń aýlasynda sport alań­qaılary bar. Elordada salamatty ómir saltyn ustanamyn degen janǵa barlyq jaǵdaı jasalǵan, tek ózińizde ynta men jiger bolsyn!