Shekaralyq aımaqtarda jańa úıler salynady

Baǵdarlamanyń maqsaty – eldiń sheti, jeldiń ótin­degi Kúrshim, Tarbaǵataı, Katon­qara­ǵaı, Zaısan jáne Úrjar sekildi shekaradaǵy aımaqtardy damytý, turǵyndardyń áleý­met­tik ahýalyn jaqsartý, ınfraqu­ry­lymdy nyǵaıtý. Qazirgi ýaqyt­ta óńirde osy baǵyttaǵy alǵash­qy jumystar bastalyp ta ketti. Máselen, Tarbaǵataı aýdanynyń Aqsýat jáne Aqjar aýyldarynda memleket-jekemenshik seriktestik aıasynda baspanalar salynbaq. Alǵashqy úıler­diń qurylysyn sáýir aıy­nyń sońynda Aqjar aýylynda jer­gilikti kásipker Qaırat Qojahmetov bastap ketken edi. «Jalpy aýmaǵy 100 sharshy metr bolatyn úıler­diń qabyrǵasy gazbloktan tur­ǵyzylýda. Jaryq baǵan­dary, káriz júıesi, aýyzsý irgesine kelip tur. Ázirge 10 úıge kelisimshart jasalady. Iаǵnı kásipker salǵan úıler bıýdjet esebinen satyp alynady. Baspanalar kezekte turǵan kóp­balaly otbasylarǵa beriledi. Jospar boıynsha Aqsýattan – 50, Aqjardan – 50 baspana salýdy mejelep otyrmyz», dep jazǵan-dy sol kezde Tarbaǵataı aýdanynyń ákimi Serikqazy Sádýaqasov óziniń Facebook-tegi paraqshasynda.

Endi mine, ıgi is jalǵasyn taýyp, tarbaǵataılyq Dýlat Tas­te­keev, Áset Múftıev, Dar­han Shotabaev syndy kásipkerler árqaı­sysy 10-nan jına­lyp 30 úı (qos páterli) salamyz dep ýáde beripti. Keshe Aqsýat­taǵy «Et kombınaty» atalatyn yq­sham aýdanynda jer ýchaske­leri ólshenip, qazyqtary qaǵylypty.

Eskerte keteıik, Aqsýat pen Aqjarda úıler salý máselesi bıyl oblys ákimi Danıal Ahmetov Aqjar aýylyna baryp, shekaralyq aımaqtardy damytý jóninde jıyn ótkizgen kezde turǵyndar tarapynan kóterilgen bolatyn.

Shyǵys Qazaqstan oblysy,

Tarbaǵataı aýdany