Qonys toıy toılandy, toqtaǵan qurylys qozǵaldy

Qaraýylda qonys toı

Aımaq basshysy áýeli Qaraýyl aýylynda baspana kiltterin tabystaý rásimine qatysty. Áleýmettik osal sanattaǵy azamattarǵa arnalǵan Eki páterli tórt turǵyn úı el ıgiligine berildi. Ondaǵy árbir turǵyn úıdiń jalpy aýdany – 85 sharshy metr. Barlyq ınjenerlik-kommýnıkasııalyq ınfraqurylymmen qamtylǵan. Eki páter úıi avarııalyq jaǵdaıda dep tanylǵan turǵyndarǵa berilse, qalǵan bes páter kópbalaly otbasylarǵa úlestirildi.

«Shyńǵystaý atyraby – qazaq rýhynyń qaınar kózi, qara óleńniń tóri. Jıdebaıdaı qasıetti mekenimen kúlli elge qasterli ólke. О́tken men búgindi, tarıh pen taǵdyrdy jalǵaǵan qasıetti óńir. Osyndaı kıeli topyraqta búgin el úshin eleýli, halyq úshin qýanyshty sátke arnaıy jınalyp otyrmyz. Birneshe óńir turǵyny búgin baspana toıyn toılamaq. 7 otbasy baspanaly bolǵaly tur. Bir aıta keterligi, bul – bıylǵy Abaı aýdanyndaǵy alǵashqy baspana qýanyshy. Bul úrdis jyl sońyna deıin jalǵasady. Aýdanda 40-tan astam turǵyn úıli bolady. Bul – memlekettiń halyq aldyndaǵy áleýmettik jaýapkershiliginiń naqty kórinisi. Memleket basshysy Qasym-Jomart Toqaevtyń halyqtyń turmys sapasyn arttyrý jónindegi tapsyrmasyna sáıkes Abaı oblysynda turǵyndardy baspanamen qamtý jumystary júıeli túrde júzege asyp otyr. Búgin tabystalatyn árbir baspana – bir otbasynyń jańa ómirge jasaǵan qadamy, balalardyń bolashaǵyna jol ashqan ıgi bastama», dedi aımaq basshysy.

Jıynda baspanaly bolǵan Qaraýyl turǵyndary da rızashylyqtaryn bildirdi.

«Jańa baspanaǵa qol jetkizgenimizge óte qýanyshtymyz. Halyqtyń jaǵdaıyn jasap, qoldaý kórsetip jatqandaryńyzǵa alǵys aıtamyz», dedi Qaraýyl aýylynyń turǵyny Qarlyǵash Baqytbekqyzy.

Byltyr Qaraýyl aýylynda kóp jyl boıy qaraýsyz turǵan ǵımarat qaıta jańǵyrtylyp, 27 páterli turǵyn úıge aınaldy. Munda 1 bólmeli 6 páter, 2 bólmeli 16 páter, 3 bólmeli 5 páter bar. Qazirgi tańda barlyq 27 páterdiń qujattary «Otbasy bank» AQ-ǵa berilgen.

Oblys ákimi atalǵan turǵyn úıdi de aralap kórdi. Osy mańdaǵy kóp qabatty úılerdiń jylý júıesi kómirmen jylynady. Bul tótenshe jaǵdaılar talaptaryna tolyq sáıkes kelmeıtindikten, ortaq jylý qazandyǵyn salý qajettigi týyndap otyr. Aýdan ákimi Meıirjan Smaǵulov aımaq basshysyna osy máseleni jetkizdi. Oblys ákimi usynysty qoldap, jylý qazandyǵyn salýǵa tıisti qoldaý kórsetiletin aıtty. Jańa qazandyq salynsa aýdan ortalyǵyndaǵy turǵyn úılerdi, áleýmettik nysandardy jylýmen tolyq qamtamasyz eteri sózsiz.

Janar-jaǵarmaı beketi jumysyn bastady

Úlken megapolııada ıakı oblys ortalyǵynda turǵanda turatyn adamdar úshin janar-jaǵarmaı quıý beketiniń ashylýy jańalyq emes bolýy múmkin, alaıda shalǵaıdaǵy óńirlerde bul mańyzdy ekenin baryp kórgen adam túsiner. Qaraýyldaǵy janar-jaǵarmaı quıý beketiniń ashylýy aýdan halqyn qýanyshqa bólegenin óz kózimizben kórgen edik.

Osy rette oblys ákimi aýdanynyń Qaraýyl aýylyndaǵy oblystyq mańyzy bar «Qaraýyl – Semeı» avtojoly boıynda ashylǵan janar-jaǵarmaı beketin de kórdi.

Aýdan ákimdiginiń málimetinshe, jobaǵa aımaq basshysynyń «Týǵan jerge týyńdy tik» bastamasy aıasynda ınvestısııa tartylyp, jaqynda halyq ıgiligine paıdalanýǵa berilipti. Al jobanyń júzege asýyna «LUKOIL Lýbrıkants Ortalyq Azııa» JShS jáne «GAS&MUNAI» JShS qoldaý bildirgen. Nysannyń jalpy aýmaǵy 2500 sharshy metrdi quraıdy. Tartylǵan ınvestısııa kólemi – 350 mıllıon teńge. Beket zamanaýı jabdyqtalǵan 6 kolonkamen qamtylǵan. Bir mezgilde 12 kólikke benzın jáne dızel otynyn quıýǵa múmkindigi bar. Shaǵyn market jolaýshylarǵa qyzmet kórsetedi.

«Abaı aýdanynda ashylǵan jańa bekette 15-ke jýyq adam turaqty jumyspen qamtyldy. Beket aýdan halqy úshin qolaıly qyzmet usynyp, jol boıyndaǵy servısti jaqsartýǵa baǵyttalǵan», deıdi aýdan ákimi.

Janar-jaǵarmaı beketiniń jumysymen tanysqan aımaq basshysy nysannyń aýdan turǵyndary men jolaýshylar úshin mańyzyn jáne óńirde týrızmniń damýyna da oń áser etetinin, sondaı-aq atsalysqan ınvestorlarǵa alysyn aıtty.

Abaı oblysynda 500 balaǵa arnalǵan Oqýshylar saraıy ashyldy

Sý qubyry júıesi qaıta jańǵyrtylyp jatyr

Budan oblys ákimi Abaı aýdanynyń Keńgirbaı bı aýylynda júrgizilip jatqan aýyz sý qubyry júıesin qaıta jańǵyrtý jumystarymen tanysty.

Keńgirbaı bı aýyldyq okrýginde myńǵa jýyq turǵyn turady. Eldimekendegi qubyr jelisiniń jalpy uzyndyǵy – 9,4 shaqyrym. Onyń ishinde dıametri 110 mm bolatyn sý qubyry – 7,6 shaqyrym. Qazirgi ýaqytta 4,9 shaqyrymy tartylǵan. Sondaı-aq, uzyndyǵy 1,8 shaqyrym bolatyn, dıametri 25 mm sý qubyry turǵyn úılerge tartylyp jatyr. Buǵan qosa rezervýar alańy betondalyp, 10 qudyq ornatylǵan. Taza aýyz sý kózin qamtamasyz etý maqsatynda tereńdigi 45 metr bolatyn eki uńǵyma burǵylanyp, sý quramynyń zerthanalyq saraptamasy alynǵan.

Resmı málimetke saı, joba iske asyrylǵannan keıin aýyldaǵy 148 turǵyn úı men 4 ákimshilik ǵımarat ortalyqtandyrylǵan aýyz sýmen qamtylady. Qazir jalpy qurylys jumystarynyń shamamen 30 paıyzy oryndalǵan.

Aımaq basshysy nysandy aralaý barysynda aýyz sýmen qamtý aýyl turǵyndarynyń ómir sapasyna tikeleı áser etetin mańyzdy másele ekenin, sondaı-aq merdigerlerge jobany sapaly ári belgilengen merzimde aıaqtaýdy tapsyrdy.

Balalar lageri nege aıaqtalmaı tur?

Aımaq basshysy aýdandaǵy qurylysy kóp jyldan beri aıaqtalmaı, sozylyp kele jatqan áleýmettik nysandarǵa da arnaıy baryp, máseleniń mán-jaıyn tekserip qaıtty. Máselen, Bı-Ata aýyly mańyndaǵy Qarashoqy shatqalynda salynyp jatqan balalar lageriniń qurylysyn aıyryqsha aıtýǵa bolady. Bir aýysymda qyryq balany qabyldaýǵa múmkindigi bar nysannyń qurylysy 2023 jyly bastalǵanymen, merdigerlerdiń jaýapsyzdyǵynan aıaqtalmaı otyr. Qazir ǵımaratta jylytý jabdyqtaryn ornatý jáne ishki árleý jumystary qalǵan. Lager ornalasqan aýmaqta ortalyqtandyrylǵan aýyz sý júıesiniń bolmaýyna baılanysty tasymal arqyly jetkiziledi.

Oblys ákimi memlekettik sáýlet-qurylys baqylaý jáne qurylys basqarmalaryna nysan qurylysyn qatań qadaǵalaýǵa alýdy, merdigerge jumysty sapaly aıaqtaýdy tapsyrdy.

«Mundaǵy qurylys jumystaryn oqýshylardyń jazǵy demalysyna deıin aıaqtaýymyz kerek. Sondyqtan jumysty jandandyrý qajet», dedi B.Ýálı.   

Sonymen qatar Kókbaı aýylynda salynyp jatqan «saqaldy qurylysqa» aınalǵan nysannyń biri – sport modýli. Munda da qurylys jumystary 2023 jyly bastalǵanymen belgilengen merzimde aıaqtalmaı keledi. Merdigerler jobany aıaqtaý úshin qosymsha qarjy qajettigin jetkizdi. Jobaǵa sáıkes sport modýliniń jylý júıesi elektr energııasy arqyly jumys isteýge beıimdelgen. Alaıda nysannyń úzdiksiz ári tıimdi jumysyn qamtamasyz etý úshin ortalyqtandyrylǵan jylý qazandyǵyn salý týraly usynys aıtyldy.

Oblys ákimi jaýapty basqarmalarǵa ǵımarat qurylysyn aıaqtaý úshin tıisti qujattamalardy ázirleýdi, merdigerlerge qurylysty sapaly aıaqtaýdy tapsyrdy.

«Abaı aýdanyndaǵy «saqaldy qurylystardy», ıaǵnı, qurylysy uzaqqa sozylyp ketken nysandar, balalar lageri men sport modýliniń qurylysyn óz kózimmen kóreıin dep arnaıy kelip otyrmyn. Merdiger mekemelerdiń nysandardy ýaqytynda qoldanysqa berýin baqylaýda ustaıtyn bolamyz», dedi aımaq basshysy.

Aıtpaqshy, bıyl Abaıdyń kórnekti shákirti, aqyn-aǵartýshy Kókbaı Janataıulynyń týǵanyna 165 jyl tolyp otyr. Shyńǵystaý óńirinde ǵumyr keshken Kókbaı qazaq rýhanııatynda Abaı dástúrin jalǵastyrǵan, aǵartýshylyq pen ádil tórelikti qatar ustanǵan tulǵa retinde tanyldy. Onyń jyrlary ulttyq ádebıetimizdiń aıqyn aıshyqty bóligi ekeni sózsiz.

Ákim 100-den astam ınvestormen kezdesti: 2025 jyly Abaı oblysyna qansha mlrd qarjy tartyldy?