Qazaqstan Respýblıkasy Ortalyq referendým komıssııasynyń otyrysynda 2026 jylǵy 15 naýryzda ótetin jańa Konstıtýsııanyń jobasy boıynsha referendýmǵa qansha azamat qatysa alatyny aıtyldy, dep habarlaıdy Egemen.kz.
«Bıylǵy jyldyń 1 qańtaryndaǵy jaǵdaı boıynsha turǵylyqty jeri boıynsha turaqty tirkelgen 12 416 759 azamat saılaýshylar tizilimine engizildi. Iаǵnı búginde respýblıkalyq referendýmǵa qatysý quqyǵy bar azamattardyń tizimin jasaýǵa negiz bar. Endi tek qańtar-aqpan aılaryndaǵy kóshi-qon úderisterine jáne azamattardan túsken ótinishterge baılanysty naqty túzetýler engizý qajet», dedi Ortalyq referendým komıssııasynyń múshesi Azamat Aımanaqumov.
Onyń aıtýynsha, referendýmdy uıymdastyrý úshin saılaý ýchaskeleriniń eki túri paıdalanylady – azamattardyń turǵylyqty jeri boıynsha jáne ýaqytsha bolatyn oryndarda qurylǵan ýchaskeler.
«Jalpy saılaý ýchaskeleriniń sany – 10 413. Onyń ishinde azamattardyń tirkelgen jeri boıynsha – 9 779, ýaqytsha bolatyn oryndarda – 634, sonyń ishinde sheteldegi ýchaskeler sany – 82. Bul 82 ýchaske 64 memlekette ornalasqan. Referendým komıssııalary músheleriniń jalpy sany – 71 044 adam», dep atap ótti komıssııa múshesi.
Otyrysta 2026 jylǵy 15 naýryzǵa taǵaıyndalǵan respýblıkalyq referendýmdy daıyndaý men ótkizýdiń negizgi is-sharalarynyń kúntizbelik jospary bekitildi.
Eske salaıyq, buǵan deıin Prezıdent Qasym-Jomart Toqaev 2026 jylǵy 15 naýryzda respýblıkalyq referendým ótkizý týraly jarlyqqa qol qoıǵan edi.