Abaı oblysynda alıment óndirý máselesine qatysty jedel-profılaktıkalyq is-sharalar júrip jatyr. Tekserý barysynda alıment boıynsha bereshegi bar azamattar anyqtalǵan. Qaryz kólemi birneshe myń teńgeden bastap, qomaqty qarajatqa deıin jetken jaǵdaılar kezdesedi, dep jazady Egemen.kz.
Balanyń nesibesine salǵyrt qaraý – tek otbasynyń emes, qoǵam úshin de mańyzdy jaıt ekeni ras. Osy máseleniń mán-jaıyn naqtylaý úshin Abaı oblysy Jeke sot oryndaýshylarynyń óńirlik palatasynyń basshysy Maǵjan Esenbaevqa saýal joldaǵan edik. Onyń aıtýynsha, alıment óndirý tártibi kúsheıgen. Máselen, alımentke baılanysty sot buıryǵy nemese atqarýshylyq qujat boryshkerdiń turǵylyqty jeri ne jumys orny boıynsha jeke sot oryndaýshysyna beriledi. Sodan keıin óndirip alý jumysy bastalady.
«Eger boryshker resmı jumys istemese, bereshek eldegi ortasha aılyq jalaqy mólsherine súıenip esepteledi. Bul norma alıment tóleýden jaltarýdyń aldyn alýǵa baǵyttalǵan. Bereshegi bar azamattardyń banktik shottary buǵattalyp, múlkine tyıym salynady. Elden shyǵýyna ýaqytsha shekteý qoıylady. Sondaı-aq kólik quralyn basqarý quqyǵy shekteledi», dedi Maǵjan Esenbaev.
14 myń boryshker alıment tóleýden qashyp júr
О́ńirlik palatanyń dereginshe, boryshkerlerge qatysty májbúrleý is-sharalary kezeń-kezeńimen qoldanylady. Sot oryndaýshysynyń talaptaryn oryndamaǵan tulǵa ákimshilik jaýapkershilikke tartylady. Aıyppul salynady, qoǵamdyq jumysqa jiberiledi nemese ákimshilik qamaýǵa alynady.
Al alıment tóleýden qasaqana ári uzaq ýaqyt jaltarǵandar qylmystyq jaýapkershilikke tartylady. Mundaı jaǵdaıda aıyppul salý, túzeý jumystaryna tartý, bostandyǵyn shekteý nemese bas bostandyǵynan aıyrý jazalary qarastyrylǵan. Buǵan qosa, elden shyǵýǵa tyıym salý, kólik júrgizý quqyǵyn shekteý jáne múlkin tárkileý sharalary qatar júredi.
Taraptar ózderine bekitilgen jeke sot oryndaýshysy týraly málimetti birneshe jolmen ala alady. ADILETGOV mobıldi qosymshasy arqyly, Ádilet mınıstrliginiń resmı saıtyndaǵy tizilimnen nemese turǵylyqty jeri boıynsha О́ńirlik jeke sot oryndaýshylary palatasyna júginý arqyly aqparatqa qol jetkizýge bolady. О́ńirlik palata ókilderi alıment óndirý jumystary aldaǵy ýaqytta da jalǵasatynyn jetkizdi.
Astanada jeke sot oryndaýshy alıment tólemegen ákeden 196 mln teńge óndirip aldy