Jańa maýsymǵa óńir qonaqúıleri, meımanhanalary men sanatorıleri úlken úmit artyp otyr. Qazirgi tańda barlyq týrıstik nysandar óńirdiń bas sanıtarlyq dáriger bekitken talaptarǵa saı qyzmet atqarýda.
Jańa týrıstik maýsymǵa ázirlik aıasynda óńirlik týrızm basqarmasy jetekshileri Zerendi men Býrabaı óńirleriniń týrıstik nysan ıelerimen kezdesti. Basqarmanyń jańa taǵaıyndalǵan jetekshisi Ýálıhan Ǵabdýllın óńirdegi demalys nysandary jazǵy maýsymǵa 100% daıyn dep otyr. Basqarma mamandary bıylǵy týrıster aǵymy ótken jyldan kem bolmaıdy degen senimde. 2019 jyly bul kórsetkish mıllıon úsh júz myńnan asqan bolatyn.
– Barlyq nysandardyń ázirligi baǵalanyp, tıisti aktiler toltyrylady. Ol qujatta damalys oryndarynyń sanıtarlyq talaptarǵa saı bolýy tirkeledi. Biz ishki týrızmge úmit artyp otyrmyz,–deıdi oblystyq týrızm basqarmasynyń basshysy Ýálıhan Ǵabdýllın.
Bıznes ókilderi ótken eki aıdaǵy shyǵyn kólemin eseptep, óteý joldaryn izdestirýde. Al, týrıster ǵalamtor jelisinde tıimdi sharttar men demalý múmkindigin belsendi izdestirýde. Oblystyq demalys jáne týrızm ındýstrııasy qaýymdastyǵynyń tóraǵasy qazaqstandyqtar mundaı aqparattyq saıttardy keńinen qoldanyp otyrǵanyn aıtady. Demek, otandyq demalys oryndaryn ishki týrıstik aǵymmen toltyrýǵa múmkindik mol.
– Týrbıznes sandyq marketıngtiń múmkindigin jańasha baǵalaı bastady. Eki aı boıy biz óz múmkindikterimiz ben usynylǵan demalys oryndarynyń artyqshylyǵyn barynsha jarnamalaı bildik. Munyń nátıjesi aldaǵy ýaqytta kórinis beredi. 1 maýsymnan bastap, adamdar eki aı boıy ınternetten kórgen, josparlaǵan demalys nysandaryna kele bastaıdy,– deıdi oblystyq demalys jáne týrızm ındýstrııasy qaýymdastyǵynyń tóraǵasy Shynarbek Batyrhanov.
Jańa maýsym bastalǵanǵa deıin-aq, qazaqstandyqtar demalys oryndaryna aldyn-ala tapsyrys bergen. Demek, jańa maýsymnan úmit zor. Baǵasyna kelsek, sarapshylar bıznes-qurylymdardyń shyǵyndary men naryqtaǵy ózgeristerdi eskerip, 15 prosentke deıin qymbattatýy múmkin degen boljam aıtyp otyr.