Jergilikti qyzdar quramasy el chempıonatyna qatysady. Bul kúni burymdy boksshylar qyzý daıyndyq ústinde. Aıtýly báseke qyrkúıek aıynda Almaty shaharynda ótedi dep josparlanǵan. 10 salmaq dárejesinde ótetin jarysta oblystyń namysyn 5 boksshy qorǵaıdy.
Karına Ibragımova belgili boksshy. Ol álemdik jarystardyń júldegeri. Qazaqstan chempıonatynyń da birneshe dúrkin jeńimpazy. Basty maqsaty el chempıonatynda jeńis tuǵyryna kóterilip, olımpıada oıyndaryna qatysý.
–Men 60 keli salmaqta synǵa túsem. Bul olımpıadalyq salmaq. Biraq ta alda ótetin olımpıada oıyndaryna osy salmaqta áli eshkim joldama alǵan joq. Sondyqtan, osy el chempıonatynda barymdy salam. Sebebi, osy jarysta jeńiske jetsem, olımpıada oıyndaryna joldama beretin jarysqa qatysa alam,–deıdi bokstan álem chempıonatynyń qola júldegeri Karına Ibragımova.
Tótenshe jaǵdaı rejımi kezinde de boksshy qyzdar óz daıyndyqtaryn toqtatqan joq. Olar ashyq aspan astyndaǵy sport keshenderinde jattyqqan. Al, osy aptadan bastap sportzaldaryna qaıta oraldy. Endi bapkerdiń baqylaýymen daıyndyq jumysaryn pysyqtaýda.
–Jarysqa qatysatyn bul qyzdardyń barlyǵy ulttyq quramanyń sapynda júrgender. Tek aýyr salmaqtaǵy boksshymyz osyndaı jarysqa alǵashqy ret qatysqaly jatyr. Qyzdardyń barlyǵy arnaıy irikteýden ótti. 8 maýsym kúni boksshylar Almatyǵa baryp, daıyndyq jumystaryn sol jatqa jalǵastyrady,–deıdi bokstan oblystyq qyzdar quramasynyń aǵa jattyqtyrýshysy Aleksandr Vysoskıı.
Iá, 5 arýǵa artar senim mol. Aıta ketý kerek, qazirgi tańda boksqa qyzyqqan burymdylar qatary kóbeıip keledi. Onyń aıqyn dáleli, bastapqy kezde qyzdar boks klýby tek oblys ortalyǵynda ǵana bolsa, qazirrgi tańda Jaqsy, Býrabaı aýdandary men Stepnogorsk qalasynda da ashylǵan. Bul ortalyqtar bolashaq boks chempıondaryn túletýge septigin tıgizedi.