Eki aıǵa jýyq Petropavldyń saıajaı qoǵamdaryn qalalyq Polısııa basqarmasynyń Jergilikti polısııa qyzmeti bólimi kavalerııa vzvodynyń qyzmetkerleri kúzetýde. Karantın shekteýleri alynýyna jáne aýa raıynyń jylynýyna baılanysty kúzet baǵyttary kóbeıdi.
Qazir «Zarechnyı» men «Novopavlovka» kentterindegi barlyq saıajaı qoǵamdary atty ásker kúzetiniń aýqymyna endi. «Olardyń mindeti – baý-baqshalarda jaıaý jáne avtopatrýlderdiń ótýi qıyn aımaqtarda qoǵamdyq tártipti qamtamasyz etý. Urlyq boldyrmaý úshin olar saıajaı qoǵamdarynyń tóraǵalarymen jáne kúzetshilerimen baılanys jasaıdy, bógde adamdardy nazarǵa alady, túrli quqyq buzýshylyqtarǵa jol bermeý boıynsha saıajaıshylarmen profılaktıkalyq áńgime júrgizedi», deıdi SQO PD bastyǵynyń birinshi orynbasary, polısııa polkovnıgi Qanat Aıtbaev.
Keıbir saıajaıshylardyń qaldyqtardy, qaý shópterdi jaǵýy úreı týǵyzady. Bir-eki kún buryn «Vesnıanka» qaýymdastyǵyna órt sóndirý jasaqtaryn shaqyrtýǵa týra keldi. Saıajaı ıesi byltyrǵy qýraǵan shópti jaǵamyn dep úı-jaısyz qala jazdady. Sonymen qatar, polıseıler saıajaıshylardyń tynyshtyǵyn buzatyn maskúnemderdi de ustap, tıisti jerge jetkizedi. Jumystyń taǵy bir baǵyty – abattandyrý qaǵıdalaryn saqtaý, stıhııaly qoqys oryndarynyń paıda bolýyna jol bermeý. Kavalerıster osyndaı faktilerdi saıajaıshylarmen jáne qaýymdastyq tóraǵalarymen birlesip tekseredi.
Saıajaıshylar ózderiniń tynyshtyǵy men saýlyǵyn kúzetip júrgen atty polıseılerge rıza. Balalar da olardyń qylyǵyn qyzyqtap, keıde atqa mingizýdi ótinip júredi.
Soltústik Qazaqstan oblysy