Elimizdiń Memlekettik rámizderi kúnine oraı, Taraz qalasyndaǵy «Jastar» alleıasynda «Eltańbam – eldigim, kók týym – teńdigim!» atty patrıottyq aksııasy aıasynda avto-moto-velosherý uıymdastyryldy.
Merekelik sherýge qatysýshylar «Jastar» alleıasyndaǵy «Sahna» alańshasynan Jeltoqsan kóshesine túsip, odan ári Tóle bı, Jambyl dańǵyldary arqyly D.Qonaev, S.Seıfýllın, B.Momyshuly, Táýke han kóshelerimen Qazaqstan Respýblıkasynyń Tuńǵysh Prezıdenti saıabaǵyna deıingi joldy júrip ótti. Tuńǵysh Prezıdent saıabaǵynda «Eltańbam – eldigim, kók týym – teńdigim!» atty aksııa jalǵasyn taýyp, bir mezgilde Memlekettik Gımn oryndaldy. Atalǵan aksııaǵa Jambyl oblystyq tótenshe jaǵdaılar departamenti №2 órt sóndirý bóliminiń, Taraz qalalyq polısııa basqarmasynyń, «Qazfosfat» jaýapkershiligi shekteýli seriktestigi «Jańa Jambyl fosfor zaýyty» mekemesiniń jáne ózge de mekemelerdiń qyzmetkerleri qatysty. Sondaı-aq, «Qasıetti kókbaıraǵy elimniń!» atty aksııasy aıasynda Taraz qalasyndaǵy kópqabatty turǵyn úılerdiń qasbetterine Memlekettik Tý ilindi.
Sonymen qatar Memlekettik rámizder kúnine oraı, Taraz memlekettik pedagogıkalyq ýnıversıtetiniń aýlasynda «Kók týdyń jelbiregeni» atty patrıottyq saltanatty jıyn ótti. Ýnıversıtet rektory Erjan Ámirbekuly atalǵan oqý ordasynyń ujymyn jáne stýdentterdi aıtýly merekemen quttyqtap, bolashaqta da eldiń tatýlyǵyn tý etip, abyroıyn asqaqtatatyn búgingi jastar ekenin atap ótti. Shara barysynda ýnıversıtet stýdentter «Elim meniń», «Kók týdyń jelbiregeni» atty patrıottyq ánderdi shyrqady. Sonymen qatar, atalǵan oqý ornynda qazaq tilinen bólek, aǵylshyn, túrik, qytaı, koreı, fransýz tilderinde bilim alyp júrgen jastar sol tilde jınalǵandardy quttyqtady.
Jambyl oblysy