Oblys boıynsha tuqym sharýashylyǵy sanalatyn Sandyqtaý aýdanyndaǵy «Kamenka jáne D» seriktestiginiń eginshileri dán sińirý jumystaryn agrotehnıkalyq sharalarǵa saı eki aptanyń ishinde aıaqtady.
Mamyrdyń alǵashqy aptasynda alqap basyna shyqqan sheteldik 9 agregat 16 myń gektar jerge dán sińirdi.
–Ár jyldyń óz ereksheligi bar. Bıyl kóktem erte shyqty. Sol sebepti agregattardy qurǵaq alqaptarǵa shyǵardyq. Mol ónim dándi daqyldardyń surpyna saılanysty. Bıyl «Omsk-28», Oral-Sibirlik «Lıýbava-5» jáne «Boevchanka» bıdaı tuqymdaryn paıdalandyq. Olar bizdiń ormandy óńirdiń aýa raıy úshin qolaıly, – deıdi seriktestiktiń bas dırektory Alekseı Djeıranov.
Tuqym seýip bitken kúnniń erteńinde seriktestiktiń mehanızatorlary par jyrtýǵa kirisip ketti. Bul shara da bolashaq mol ónimniń kepili.
–Biz jyl saıyn 5 myń gektardan astam jerdiń paryn jyrtamyz. Bul jumys agrotehnıkalyq sharalardy jasaý merziminde ótýi tıis. Taǵy bir aıta ketetin jáıt, biz-eki úsh jyldan beri hımııalyq tyńaıtqyshty azaıttyq, – deıdi agronom Sergeı Tıýkov.
Aýa raıyn boljaýshylar birer kúnde jańbyr jaýady degen qýanyshty habar aıtýda. Osy sóz dıqan kóńilin demdep tur.
Aqmola oblysy