Búgin, 4 qazan kúni Qazaqstannyń tuńǵysh derbes prokýrory, belgili qoǵam qaıratkeri, qýǵyn-súrgin qurbany, Syr eliniń perzenti Súleımen Esqaraevtyń týǵanyna 115 jyl tolýyna arnalǵan is-shara ótkizildi. Bul týraly oblystyq prokýratýranyń baspasóz hatshysy Aqmanat Sháımerdenova habarlady.
Sharaǵa qatysýshylar aldymen oblystyq prokýratýra ǵımaraty aldyna ornatylǵan S. Esqaraev eskertkishiniń ashylý rásimi boldy. Ol Sýretshiler odaǵynyń múshesi, «Mádenıet salasynyń úzdigi» Muratbaı Úmbetovtiń qolynan shyqqan. Al eskertkishtiń ashylý saltanaty aldynda «Ulttyń rýh tulǵasy» atty teatrlandyrylǵan qoıylym kórsetildi. Sodan soń Qazaqstan Bas Prokýrorynyń orynbasary Nurmahanbet Isaev Bas prokýror Ashat Daýylbaevtyń osy oqıǵaǵa arnaǵan izgi lebizin jetkizdi. Budan keıin oblys ákimi Qyrymbek Kósherbaev, oblystyq ardagerler keńesiniń tóraǵasy Seıilbek Shaýhamanov sóz sóılep, S.Esqaraev tarıhta alatyn erekshe orny týraly áńgimeledi. Sharaǵa S. Esqaraevtyń qyzy Marıetta Esqaraeva, nemeresi Marat Baımuhanov jáne basqa da týystary, prokýratýra organdarynyń ardagerleri taǵy basqalar qatysty.
Kelesi kezekte oblystyq prokýratýra ǵımaratynda S.Esqaraev atyndaǵy vedomstvolyq murajaıdyń ashylýy da bolyp ótti. S. Esqaraev murajaıy Qyzylorda oblystyq prokýratýrasynyń bastamasymen daıyndaldy. Murajaıda táýelsiz Qazaqstannyń qalyptasý kezeńi men Qyzylorda oblysynyń jáne prokýratýra organdarynyń damý tarıhy, Súleımen Esqaraevtyń ómiri men qyzmetine qatysty derekter saqtalǵan.
Shara aıasynda «S.Esqaraev: Táýelsiz Qazaqstan prokýratýrasynyń qalyptasýy men damýy atty ǵylymı-praktıkalyq konferensııa ótti. Onda oblys ákimi Qyrymbek Kósherbaev, Bas prokýratýranyń S. Esqaraev atyndaǵy ınstıtýty dırektorynyń orynbasary, zań ǵylymdarynyń doktory, professor Esbergen Alaýhanov, tarıh ǵylymdarynyń kandıdaty Baýyrjan Eńsepov, zań ǵylymdarynyń kandıdaty Erlan Altaev, Qorqyt Ata atyndaǵy Qyzylorda memlekettik ýnıversıtetiniń stýdenti Aqerke Almatqyzy baıandama jasady.
Konferensııa aıasynda S. Esqaraevtyń ómiri men qyzmetine arnalǵan «Tarlanboz» kitaby men derekti fılminiń tusaýkeseri boldy.
Respýblıkamyzdyń prokýratýra organdary men ishki ister júıesin men óz qolymen qurǵan Súleımen Esqaraevtyń 115 jyldyq mereıtoıyn eskere otyryp, Qyzylorda oblystyq prokýratýrasy Bas prokýratýranyń qoldaýymen dara tulǵanyń eren eńbegin máńgi este qaldyrý maqsatynda «Tarlanboz» kitabyn shyǵarýdy qolǵa aldy.
«Tarlanboz» kitabynyń redaksııalyq alqasyn oblys prokýrory, aǵa ádilet keńesshisi Saparbek Nurpeıisov basqardy.
Konferensııa barysynda oblys ákimi Qyrymbek Kósherbaev C.Esqaraevtyń 115 jyldyq mereıtoılyq tósbelgilerin tapsyrdy.
Sońynan S. Esqaraev júldesi úshin bolyp ótken sport týrnırleriniń jeńimpazdary men júldegerleri marapattaldy.
Jańagúl Serdaly.