Qazaqstandaǵy jas daryndy boksshynyń biri Bek Nurmaǵanbet kásipqoı rıngte baq synaýdy qup kórdi. Bul týraly bylǵary qolǵap sheberiniń ózi áleýmettik jelidegi paraqshasynda jarııalady.
22 jastaǵy Túrkistan boks mektebiniń túlegi 2016 jyly Reseıdiń Ekaterınbýrg qalasynda ótken jastar arasyndaǵy álem chempıonatynyń kúmis júldegeri, eresekter arasynda Taılandta jalaýy jelbiregen Azııa chempıonatynda top jarǵan bolatyn. 2017 jyly Nur-Sultanda ótken Prezıdent kýbogy jolyndaǵy jarysta top jarsa, kelesi jyly kúmis júldeger atandy. Sondaı-aq Bek Nurmaǵanbet birneshe halyqaralyq týrnırdiń júldegeri sanalady.
2018 jyly Aqtaý qalasynda uıymdastyrylǵan bokstan el birinshiliginde 81 kılo salmaqta jeńimpaz atanyp, birden ulttyq qurama bapkerleriniń kózine túsip, óz salmaǵynda Qazaqstannyń birinshi nómirli boksshysy atandy. Alaıda byltyr jaraqatyna baılanysty álem chempıonatyna bara almaǵan soń, onyń orynyna Bekzat Nurdaýletov jahandyq dodada synǵa tústi. Reseı tórinde ótken birinshilikte Bekzattyń jasyndaı jarqyldaǵanyna tek Qazaqstan emes, búkil álem kýá boldy. Jartylaı fınalda kýbalyq La Krýzdy, fınalda ózbek Dilshodbek Rýzmetovty jeńip qana qoımaı, quramdaǵy ornyn naqtylap qoıdy. Sol jeńisiniń arqasynda Nurdáýletov bıyl Ammandaǵy Olımpıadaǵa irikteýge baryp, Tokıoǵa joldama aldy. Osylaısha, Bektiń Olımpııa oıyndaryna baramyn degen armany taǵy 4 jylǵa shegerilgen soń ol birden baǵyn kásipqoı boksta synap kórýge bel býdy.
Qazirgi tańda «Suleimen promotions» kompanııasymen ekinshi orta salmaqtaǵy WBA International, WBO Global jáne WBC Asian beldiginiń ıegeri Aıdos Erbosynuly men jartylaı orta salmaqtaǵy WBA intercontinental, WBO oriental jáne IBF Australasia beldigi bar Nursultan Jańbaev syndy boksshylar jumys isteıdi.