Maldyń júnin jýyp-shaıyp tazartyp, keptirgen soń qajetine qaraı san túrli boıaýmen ábden qanyqtyra boıap kózdiń jaýyn alatyn ásem dúnıelerdi – qolóner buıymdaryn jasap shyǵarýda analarymyz aldyna jan salǵandyǵy sonshalyqty, muny qazaqtyń ulttyq qolóneriniń ajyramas bir bóligi retinde qalyptastyryp, damyta aldy.
Qyzyl-jasyl taldyrmadan tekemet túrin oıyp, birneshe tústi jipterdi qazyq aınaldyra júgirtip baý-basqur quryp, alýan túli júnderden oı salyp, shı toqyǵan olardyń sheberligin búgingi urpaq tek mýzeılerden qyzyqtap júrgeni jasyryn emes. Al olardyń jasalý tehnologııasy – úlken ǵylym, kózben kórip, qolmen jasamasa, meńgertýi qıyn jumbaq syr.
Sondyqtan keshegi sheber analardyń kózin kórip, taǵylymyn alǵan, «istegeniń maǵan jaqsy – úırengeniń ózińe jaqsy» dep úlkenderdiń jumsaǵanyn qalt jibermeı tyńdap ósken sheberler Á.Saǵynaeva men G.Balǵabaeva búginde óz kórgen-bilgenderin qyzyǵýshylyq tanytyp, ynta bildirgenderge úıretýmen keledi. Jýyrda Mańǵystaý oblysynyń mádenıet, tilderdi damytý jáne arhıv isi basqarmasynyń qoldaýymen, «Altyn oımaq» qolónerdi qoldaý qoǵamdyq qorynyń uıymdastyrýymen umytylyp bara jatqan qazaq dástúrli qolónerin jańǵyrtý jáne turǵyndardy kásipkerlikke baýlý maqsatynda «Júndi jáne jipti tabıǵı jáne hımııalyq jolmen boıaý tásilderi» atty trenıng ótti.
Aqshuqyr aýylynda ótken trenıngke qyzyǵýshylyq tanytqandar kóp bolǵanmen, tótenshe jaǵdaı tártibine saı nebári 15 adam ǵana qatysý múmkindigine ıe boldy.
Qatysýshylarǵa tájirıbeli qos trener boıaý túrleri, ony tańdaý, jún men jipti boıaý tásilderi, tabıǵı boıaýdyń erekshelikteri týraly, ózge de boıaýǵa qatysty bilgenderin aıtty. Mysaly, tekemet basýda tekemettiń tańdalǵan túsi men oǵan jarasymdy boıaý túrleri, sondaı-aq aq basqur men qyzyl basqur toqýdaǵy qoldanylatyn jip tústeri týraly aıtylyp, jún men jipti boıaý tájirıbe túrinde kórsetildi.
Trenıngke qatysýshylar úıretýshilerge rızashylyqtaryn bildirip, sabaqtyń qyzyqty ótkenine qýandy. Keshe aýyl-aımaqta jún boıap, baý toqyp, syrǵalaq aınaldyrý, ózge de qolóner túrlerimen aınalyspaıtyn qyz-kelinshekke tosyrqaı qaraıtyn eldiń búgingi urpaǵy bul ónerlerdi tek el ishindegi biren-saran jasy úlkenderden estip-bilip, is-tájirıbesin kórse tańǵalatyn dárejedemiz. Zaman aǵymy, ýaqyt talabynyń ıirimi áser etpeı qoımaıtyn da bolar, degenmen tól ónerdi ógeısitpegen jaqsy. Osy oraıda baba dástúrdi dáriptep júrgen Á.Saǵynaeva men G.Balǵabaevaǵa jurtshylyq tarapynan bek rızashylyq bar.
Mańǵystaý oblysy