Eki kún buryn «Shopan-ata» ulttyq qoı ósirýshiler qaýymdastyǵy tóraǵasy Almasbek Sadyrbaev Almaty oblysy, Alakól aýdanynda ornalasqan malshylardyń jaı-kúıin arqaý etken vıdeo jarııalady. Beıne jazbada ádettegi jupyny aýyl, júdegen malshy, eski-qusqy tehnıka atymen joq. Nazar aýdararlyq tusy da osy edi. Kerisinshe, malshylarǵa arnalǵan baspananyń qaladaǵy úıge bergisiz salynýy tańqaldyrdy. Malshylarǵa joǵary deńgeıde jaǵdaı jasalǵanyn kórgen jurt «naǵyz úlgi bolarlyq is» dep baǵalap jatyr, - dep habarlaıdy Egemen.kz.
Vıdeo avtoryna qońyraý shaldyq. Alakól aýdanyna nege barǵanyn, sharýashylyqtyń nemen aınalysyp jatqanyn surap bildik. Onyń aıtýynsha, belgili kásipker, mesenat, "ZHERSU" ınvestısııalyq-óndiristik korporasııasynyń baqylaý keńesiniń tóraǵasy Baýyrjan Ospanov ony arnaıy shaqyrǵan kórinedi. Ondaǵy maqsaty - sharýashylyqta qoı basyn arttyryýdyń jón-jobasyn keńesip, aqyldasý bolsa kerek. Kásipkerdi, ásirese, qoı sharýashylyǵyna baılanysty aldaǵy jyldary bolýy múmkin zańnamalyq ózgerister men tól basyn kóbeıtýdiń joldary qyzyqtyrypty. Al malshylarǵa arnap jasalǵan keshendi jumystyń ozyq úlgisin kórgen A.Sadyrbaev tań-tamasha qalǵanyn aıtady. Tipti sol jerden kásipkermen suhbattasa otyryp, keshendi vıdeoǵa túsirip alypty.
Malshylar turatyn úlken úı otbasyly jáne boıdaq azamattarǵa arnalǵan bólmelerden turady. Ár qaısysynda turmystyq qajettilikke qajet jıhazdar men quraldar qoıylǵan. Jeke jýynatyn bólmeleri, demalys oryndary, tipti shaǵyn kitaphana men kınoteatry da jumys istep tur. Jeke jáne ortaq ashanalary bar. Munda kóbine jylqyshylar men baqtashylar jaıǵasqan. Jumysshylardyń balalary úshin oıyn alańy qurastyrylǵan.
Sondaı-aq shopandarǵa bólek ǵımarat salynǵanyn kórýge bolady. Shamamen jalpy aýdany 46 sharshy metrdi quraıtyn bólmede jýynatyn jáne demalatyn oryn, sondaı-aq qonaq zaly bar. Baýyrjan Ospanovtyń sózine qaraǵanda, mal basyn arttyrýǵa baılanysty qoıshylardyń sanyn kóbeıtpek. Sol sebepti áli 125 úı salynady. Mundaǵy jalaqy mólsheri 300-600 myń teńge kóleminde. Tipti mamandardyń jumysyn jeńildetý maqsatynda arnaıy kólikter berilgen. Munda avtoturaq, kólik jýatyn oryn jumys istep tur.
Jumys barysyn jeńildetý úshin tehnıkalyq múmkindikter barynsha qarastyrylǵan. Jylqylarǵa GPS qondyryǵysy salynǵan. Sondyqtan malshylar ornalasqan aımaq ınternetpen qamtylǵan. Sonyń arqasynda mańaıdaǵy Kókterek jáne Arqarly aýyldary da uıaly baılanysqa qol jetkizgen. Keshen tolyq energııamen jabdyqtalǵan. Munda elektr toǵyn 80% únemdeıtin barǵdarlama engizilgen. Mysaly, aı saıyn orta eseppen alǵanda keshenniń toqqa tóleıtin aqysy – 71 myń teńgeniń kóleminde. Budan bólek sý máselesi de ońtaıly sheshilgen. Ǵımarat ishinde 4 qyzmetker jumys isteıdi.
- Mal baqqan adamdarǵa joǵary deńgeıde keshen salyp, jaǵdaıyn jaqsartyp berý - ekiniń biri istep bere alatyn sharýa emes. Men mundaı júıeli jumysty esh jerden kezdestirmedim. Úlgi bolarlyq is. Jastardy aýylsharýashylyǵy salasynda eńbek etýge tartýdyń bir joly dese de bolady, - deıdi Almasbek Sadyrbaev.
Sharýashylyqtyń endigi jospary: 10 myń jylqyny 20 myńǵa jetkizý. Sonymen qatar qoı sanyn arttyrý kózdelgen. Basty maqsat – et eksportyn qolǵa alý.