Mundaı múmkindik halyqaralyq standartty testileýlerdi tapsyrǵan talapkerlerge berilip otyr. Bul týraly biz «Talapkerge talap kóbeıip tur», degen maqalamyzda jazǵanbyz. Endi naqty qandaı testileýlerdi tapsyrǵany týraly sertıfıkattyń kerek ekeni jáne baldy aýystyrý shkalasynyń qalaı esepteletini jónindi habardar etýdi jón kórdik.
SAT, ACT jáne IB halyqaralyq standarttalǵan testileýlerdiń sertıfıkaty bar tulǵalar bilim berý grantyn taǵaıyndaý konkýrsyna qatysa alady nemese JOO-nyń aqyly bólimine túse alady.
Bilim jáne ǵylym mınıstrligi bul týraly: «SAT, ACT jáne IB halyqaralyq standarttalǵan testileýler shkalasynyń UBT balyna aýystyrylýy joǵary bilimniń aıasyn keńeıtý úshin engizildi», dep habarlady.
SAT testileýiniń balyn UBT balyna aýystyrý tek SAT reasoning (mekteptegi daǵdylar – oqý, hat jáne matematıka boıynsha test) jáne SAT Subject (jekelegen pánder boıynsha test) sertıfıkaty bolǵan jaǵdaıda ǵana júzege asyrylady. Sondaı-aq SAT Subject nátıjeleri UBT balyna tek beıindi pánder sáıkes kelgen jaǵdaıda ǵana aýystyrylady. «Aǵylshyn tili» páni úshin IELTS nátıjeleri eskeriledi.Qosa keteıik, IB – túlekterdi AQSh-tyń jáne Eýropa elderiniń joo-laryna daıyndaýǵa arnalǵan bilim berý baǵdarlamasy. ACT testileýi AQSh kolledjderine túsý úshin paıdalanylady. SAT – AQSh-tyń joǵarǵy oqýlaryna túsý úshin tapsyrylatyn standartty test.