Ádette adam balasy kitap oqıyn dese, ıa ýaqyty bolmaıdy, ıa qulqy bolmaıdy. Ágárákı, qym-qýyt tirshilikten moıny jar bermeı júrgen adam bolsa (biraq, oqýǵa degen nıeti túzý), keshirimdi. Al kitap oqıtyn ýaqyty da, qulqy da joqtyq – qasiret. Qoǵamǵa bir ýaqyt únsizdik ákelgen pandemııanyń ilip-alar jalǵyz ıgiligi – bos ýaqyt bolǵany ras. Kitapsúıer oqyrman osy múmkindikti molynan paıdalanǵan sekildi. Máselen, sońǵy aılarda Sıngapýr men Italııada balalar kitaptaryna suranys kóbeıse, Brazılııada ekonomıkaǵa, al irgemizdegi Reseı fantastıkany, Islandııa ǵashyqtyq romandardy oqýdy qup kóripti.
Orys oqyrmandarynyń talǵamy fantastıka men fentezı janrlaryna aýǵany – búginde qatty qarqyn alyp jatqanyn baıqadyq. Tipti bul taqyryptaǵy shyǵarmalardy ondaǵy ár tórtinshi adam oqıdy. Al Sıngapýrda balalarǵa arnalǵan aýdıokitaptar jıi tyńdalǵan. Barsha aýdıokitaptardyń ishinde balalar ádebıetiniń oqylýy buǵan deıin 15 paıyzdy qurasa, karantın ýaqytynda 24 paıyzǵa ósken.
Shvesııalyqtar qandaı kitap oqýda deseńiz, olar detektıv pen trıllerden bas almaı otyr. 45 paıyz oqyrman, salystyrmaly túrde, úlken kórsetkish. Qyzyǵy sol, Meksıkada bul janrdy 11 paıyz ǵana oqyrman tańdaǵan. Ondaǵy jurt detektıvti emes, belletrıstıka men psıhologııalyq kitaptardy oqyǵandy jón sanaıdy.
Baıqaýymyzsha, Úndistan barynsha konservatıvti el eken. Olar áli de klassıkany oqýdan jalyqpapty. Buǵan qosa mahabbat romandaryn kóp oqıtyn (16 paıyz) Islandııa da kózge erek tústi. Statıstıkaǵa sensek, ǵashyqtyq shyǵarmalarǵa qyzyǵatyn eshbir eldiń kórsetkishi ıslandııalyq oqyrmandardan asa almaǵan.
Shvedtiń Storytel atty aýdıokitaphanasy bar. Orys tilinde keń taralǵan baǵdarlamany qoldanýshylar sany óte kóp. Qazirgi tańda osy aýdıokitaphana alańynda detektıv pen trıller birinshi orynda tur. Odan keıin romandar men belletrıstıkany jurt jıi tyńdaıdy eken. Jáne naq karantın kezinde bıografııalar men ózin ózi damytatyn shyǵarmalar da suranysqa ıe bolypty.
Túrli ulttardyń tili men túsinigine hám oqyrmandyq talǵamyna qaramastan, álemde eldiń bári súısine oqıtyn bir avtor bar. Garrı Potterdiń qıly oqıǵalaryn jazatyn Djoan Roýlıng qaı reıtıngte de kósh bastap tur. Aıta keteıik, jyl basynda Garrı Potterdiń kitaby «Steppe & WORLD Publishing» baspasynan qazaq tilinde jaryq kórgen bolatyn. Satylym jaǵynan buryn-sońdy bolmaǵan rekord ornatqan jeti tomdyq shyǵarmalar jınaǵy búginge deıin álemniń seksennen astam tiline aýdarylyp, 500 mln danamen basylyp shyǵypty. Mıllıondaǵan balanyń qolynan túspegen sol shyǵarma qazaq oqyrmandary arasynda da kóp oqylyp júr.