Taıaýda ǵana qurylǵan "Qazaqstandyq sportshylar odaǵy" óz jumystaryn qarqyndy bastady. Aıtýly qoǵamdyq birlestik kúni keshe Nur-Sultan men Almaty jáne Qaraǵandy oblysy aýmaǵynda oranlasqan Balqash qalalaryndaǵy kóshelerge sport qaıratkerleriniń esimderin berý jóninde usynys bildirdi, - dep habarlady.
– El sportynyń órkendeýine eleýli eńbek sińirgen Amansha Aqbaev, Beket Mahmutov, Aleksandr Apachınskıı jáne taǵy basqa abzal azamattardyń esimderi umytylyp bara jatqany janymyzǵa batady. Sol sebepti de biz osyndaı bastama kóterdik. Nur-Sultanda Amansha Seısenulynyń, Almatyda Beket Sapabekulynyń, Balqashta Aleksandr Ivanovıchtiń atyna kóshe berilse degen usynys aıtyp, jergilikti ákimdikterge hat joldadyq. Osy ıgi bastamamyzdy sportshylar qaýymy tolyqtaı quptap otyr. Respýblıkamyzdyń ár qıyryndaǵy myńdaǵan jankúıerler de barynsha qoldaý bildirýde, – deıdi "Qazaqstandyq sportshylar odaǵy" qoǵamdyq birlestiginiń tóraǵasy Azamat Qarlyǵashev.
Joǵaryda esimderi atalǵan azamattar qazir aramyzda joq. Desek te olardyń árqaısysy artynda ólmeıtuǵyn iz qaldyrdy. Máselen, Amansha Aqbaev 1971-1991 jyldar aralyǵynda respýblıkalyq sport komıtetin basqardy. Odan keıin Týrızm, dene shynyqtyrý men sport mınıstriniń birinshi orynbasary, al 1993-2002 jyldary Qazaqstan Respýblıkasy Ulttyq Olımpıada komıtetiniń tóraǵasy boldy. Sol kezderi jerlesterimiz halyqaralyq arenalarda orasan zor tabystarǵa qol jetkizgeni barshaǵa málim.
Elimiz táýelsizdik alǵan tusta otandyq bokstyń tizginin Beket Mahmutov ustady. Sol kezden bastap bylǵary qolǵap sheberlerimiz Olımpııa oıyndary men álem chempıonattarynda, asa iri halyqaralyq jáne qurlyqtyq dodalarda tolaǵaı tabysqa qol jetkizip, tórtkúl dúnıedegi úzdik úsh komandanyń qataryna qosyldy. Aıtýly azamat 10 jyl boıy Halyqaralyq áýesqoı boks qaýymdastyǵynda (AIBA) vıse-prezıdent, birinshi vıse-prezıdent qyzmetterin abyroıly atqardy. 2009-2012 jyldar aralyǵynda respýblıkalyq dzıýdo federasııasyna jetekshilik etti. Kúrestiń bul túrindegi órleý kezeńi de dáp osy Beket Sapabekulynyń esimimen tyǵyz baılanysty ekenin eshkim joqqa shyǵara almaıdy.
Aleksandr Apachınskıı búkil ǵumyryn boksqa arnady. Jas kezinde ózi de táýir óner kórsetti, keıinnen bapkerliktiń qamytyn kıdi. Balqashta júrip-aq, talaı daryndy jáne jalyndy jastardy úlken arenaǵa shyǵardy. Solardyń arasynan Vasılıı Jırov sýyrylyp shyǵyp, 1996 jyly Atlanta Olımpıadasynyń jeńimpazy, Barker kýbogynyń ıegeri atandy. Sonymen qatar, Qazaqstannyń ulttyq qurama komandasynyń aǵa jattyqtyrýshysy bolyp uzaq jyldar boıy eńbek etken Apachınskıı gúrzi judyryqty jigitterimizdiń boks álemindegi eń bıik belesterdi baǵyndyrýyna barynsha septigin tıgizdi.
Rasynda da, Amansha Aqbaev, Beket Mahmutov jáne Aleksandr Apachınskıı syndy maıtalmandardyń Qazaqstan sportyn órkendetýge qosqan úlesteri eleýli ekeni esh kúmán týǵyzbaıdy. Kezinde olardyń barlyǵynyń da eńbekteri elendi. Keýdelerine ordendar men medaldar jarqyrap, basqa da memleketttik nagradalarmen marapattaldy. Endi joǵaryda atalǵan qalalardy abzal azamattardyń atyna kóshe berilse, esh artyq etpes degen oıdamyz. Sol sebepti de biz de qarapaıym jankúıer retinde "Qazaqstandyq sportshylar odaǵy" qoǵamdyq birlestiginiń bul bastamysyn tolyqtaı qoldaımyz.