Elimizde koronavırýsqa baılanysty tótenshe jaǵdaı jarııalanǵannan keıin qarttarǵa, jalǵyzbasty analarǵa, muqtaj otbasylarǵa kómek berýge toptasqan volonterler qarasy kóp boldy. 6 jyl boıy elimizdiń túkpir-túkpirindegi jastardy ıgi iske jumyldyryp kelgen «Qazaqstannyń volonterler lıgasy» qoǵamdyq qory da qıyn-qystaý kezeńde qaıyrymdy iske aralasamyn degen azamattardyń basyn qosyp, elge qyzmet etkenderdiń qatarynan kórindi.
2014 jyly 4 maýsymda jumysyn bastaǵan qor bıyl 6 jyldyǵyn toılady. Qoǵamdyq qor basshysy Aısulý Ernııazova ıgi ispen aınalysamyn degen kez kelgen 14 jastan asqan azamattyń lıgaǵa múshe bola alatynyn aıtady. «Bizdiń qatarymyzda mektep oqýshylary, stýdentter, tipti «kúmis volonterler», ıaǵnı 50 jastan asqan zeınet jasyndaǵy adamdar bar. Kásibine, bilimine qaramastan kez kelgen adam eriktiler qataryna qosyla alady. Biz úshin olardyń qoǵamǵa paıdaly bolsam degen nıeti mańyzdy», deıdi qor jetekshisi.
Elde karantın jarııalanǵannan keıin «Volonterler lıgasy» barlyq aımaqta bólimshelerin ashyp, jumysqa kiristi. Olar tek kómekpen shektelip qoımaı, jastar úıde ýaqytyn paıdaly ótkizsin degen maqsatta túrli baǵyttar boıynsha respýblıkalyq onlaın kýrstardy ashty. «Eriktiler aǵylshyn, qazaq, qytaı, túrik tilderin, hımııa, bıologııa, matematıka jáne basqa da pánderdi aqysyz oqytty. Almaty qalasynda volonterler Almaty ákimdigi janyndaǵy eriktilerdiń jedel shtabymen birlesip, koronavırýs ınfeksııasynyń taralýyn toqtatý úshin áleýmettik qamsyzdandyrý bólimine jáne qalanyń aýdan ákimdikterine kómektesti.
Volonterler qaýipsizdik sharalaryn saqtaý úshin jeke qorǵanys zattarymen qamtamasyz etildi. Olarǵa arnaıy kıim, maska, qolǵaptar, aıaqkıim men antıseptıkter ýaqyty úlestirilip otyrdy. Sonymen qatar arnaıy kólik bólinip, mezgilimen tamaq iship turdy», deıdi A.Ernııazova.
Búginge deıin almatylyq volonterler 10 000-nan astam muqtaj jáne áleýmettik jaǵynan az qamtylǵan azamatqa kómek kórsetken, 12 000-nan astam azyq-túlik paketin jınaǵan. Quzyrly organdar usynǵan tizimge sáıkes, múgedekter sanatyndaǵy turǵyndarǵa, qarttarǵa tamaq, dári-dármekterdi jetkizip otyrǵan.
«Álemdegi jaǵdaı volonterliktiń mańyzyn túsindirip, al eriktilerge ózderin jańa qyrynan tanytýǵa múmkindik bergendeı. О́ıtkeni bizdiń jastar koronavırýs ınfeksııasy oshaqtarynda jumys istep, mamandarǵa kómek kórsetti. Koronavırýstyń emi de, saldary da belgisiz. Osyndaı qıyn-qystaý kezeńde ózderiniń paıdaly bolsam degen izgi nıetterinen taımaı, biraz jas bel sybanyp eńbekke aralasty. Medısına qyzmetkerlerimen, quqyq qorǵaý organdarymen birlesip jumys istedi. Bul – úlken tájirıbe. Jastar ózderiniń boıyndaǵy buryn-sońdy bilmegen, ashylmaǵan qyrlaryn taba bildi. О́ıtkeni koronavırýspen kúres keshendi jumysty talap etedi. Sol keshendi jumysqa belsendi túrde atsalysýy jastarymyzǵa qanat bitirip, olardyń ynta-jigerin eseleı tústi. Karantın kezinde 5 qaıyrymdylyq aksııasy ótkizildi», deıdi Aısulý.
Uıym basshysy aıtyp ótkendeı, volonterler quqyq qorǵaý organdaryna da qolǵabys etken. Qoǵamdyq monıtorıng negizinde quqyq buzýshylyqtar anyqtalyp, tıisti organdar qajetti sharalar qabyldap otyrǵan. Volonterler kóbine tótenshe jaǵdaı kezinde jumys isteýine shekteý qoıylǵan saýda ortalyqtarynyń jáne basqa da qyzmet kórsetý nysandarynyń tártip buzǵanyn aıtty.
Oǵan qosa 700-den astam turǵynǵa senim telefondary arqyly kómek kórsetilgen. Azamattar túrli aryz-shaǵym, ótinishtermen habarlasqan. Olardyń ishinde úıge shaqyrtý boıynsha da ótinishter kelip túsken.
Kóptegen aımaqta «Volonterler lıgasy» Nur Otan partııasymen, Jas Otan jastar qanatymen jáne túrli oblystyq uıymdarmen birge jumys istedi. Volonterlerdiń turǵyndarǵa túsindirý jumystaryna da atsalysqany bar.
«Shymkent qalasyndaǵy Ortalyq saıabaqta jáne Arbatta volonterler koronavırýs ınfeksııasynan saqtaný sharalary, joldary týraly túsindirý jumystaryn júrgizdi. 1000-ǵa jýyq medısınalyq betperde men aqparattyq paraqshalar taratty. О́skemen, Almaty jáne Pavlodar qalalarynda eriktiler ózderi birneshe ret paıdalanýǵa bolatyn maskalar tigip, muqtaj jandarǵa úlestirdi. Qyzylorda qalasyndaǵy volonterler shetelderden kelgen adamdarmen kezdesip, saýaldamalar júrgizdi», deıdi A.Ernııazova.
Jalpy, áleýmettik baǵdarlamalardy ázirleý jáne adamdarǵa kómektesý maqsatynda «Volonterler lıgasy» áleýmettik jáne mádenı mańyzy bar ártúrli qalalyq, respýblıkalyq jáne halyqaralyq sharalarǵa qatysady.
Osy 6 jylda uıym volonterleri kóptegen úlken sharanyń ótkizilýine járdem etti. Olardyń qatarynda 2017 jyly Almatyda ótken XXVIII Dúnıejúzilik qysqy ýnıversıada, EKSPO-2017 Halyqaralyq kórmesi, «Almatynyń 1000 jyldyǵyna 1000 ıgi is», «О́z qalańyzdyń qaharmany bolyńyz» aksııasy, Star of Asia, Eýrazııalyq medıaforým, Almaty kınofestıvali, Qazaqstan-Reseı jastar forýmy, Ile-Balqash festıvali, Jastar Alańy jastar sammıti jáne basqalary bar. Bul sharalardyń barlyǵy biliktiligimizdi arttyryp, volonterlik mádenıetin túsinýge múmkindik berdi. 2019 jyly «Qazaqstannyń volonterler lıgasy» qoǵamdyq qory Ashyq Júrek qaıyrymdylyq jobasyn uıymdastyrdy. «Bul bastama týraly biz Elbasy Nursultan Nazarbaevtyń aldynda Jastar jylynyń ashylýynda aıtqan bolatynbyz. Joba aıasynda 8 baǵyt boıynsha jumys júrgizildi. Ár baǵyttyń ózindik mıssııasy bar. Atalǵan joba aıasynda kópbalaly jáne az qamtylǵan otbasylarǵa kómek berý, stýdentterge túrli taǵylymdamalar uıymdastyrý, medısınalyq eriktilik pen salamatty ómir saltyn dáripteý, erekshe qajettilikteri bar adamdardy áleýmettendirýge atsalysý, janýarlarǵa qamqorlyq kórsetý, ardagerlerge kómek kórsetý jáne ekotýrızm qarastyrylǵan. «Volonterler lıgasy» qatarymyzǵa qosylamyn degen azamattarǵa árdaıym ashyq. Bıylǵydaı Volonter jylynda jastar arasynda eriktilik pen qaıyrymdylyqtyń mańyzyn túsindirýge tyrysýymyz kerek. Al pandemııa – bir jaǵadan bas shyǵarsaq biz aspaıtyn asý joǵyn kórsetti», dep túıindedi óz sózin Aısulý Ernııazova.