Memleket basshysy Qasym-Jomart Toqaev "Biz Birgemiz" onlaın-forýmyna qatysty, - dep habarlaıdy Egemen.kz.
"Álemdegi barlyq elde sonyń ishinde Qazaqstanda koronavırýs indetine qarsy kúres júrgizilýde. Bul árıne óte aýqymdy, kúrdeli jumys. Osyǵan oraı memleket tarapynan teńdessiz sharalar qabyldandy. Koronavırýspen kúresý úshin bıýdjetten qomaqty qarjy bólindi. Turmysy tómen otbasylarǵa azyq-túlik taratyldy. Shaǵyn jáne orta bıznes ókilderine birqatar jeńildik jasaldy. Elbasynyń bastamasymen qurylǵan "Biz birgemiz" qorynan da kólemdi qarjy bólinip, muqtaj jandarǵa naqty kómek berilip jatyr. Bul jumysty Nur Otan partııasy belsendi túrde júzege asyrýda. Osynyń bári birligimizdiń bekemdigin kórsetedi", - dedi Qasym-Jomart Toqaev "Biz Birgemiz" onlaın-forýmynda.
Budan soń, ol koronavırýstan qaıtys bolǵandardyń týystary men jaqyndaryna kóńil aıtty.
"Degenmen bul asa juqpaly dert densaýlyǵy men ómirine qaýip tóndirip, halyqtyń ál-aýqatyna nuqsan keltirýde. Eń aldymen osy keselden qaıtys bolǵandardyń týystary men jaqyndaryna kóńil aıtamyn. Sondaı-aq vırýs juqtyrǵandardyń tezirek saýyǵyp ketýine tilektestik bildiremin. Osyndaı kúrdeli kezeńde barsha jurt jaýapkershilik tanytýdyń qanshalyqty mańyzdy ekenin túsindi dep oılaımyn", - dedi Memleket basshysy.
Onyń aıtýynsha, ár adam óziniń týystary men jaqyn adamdarynyń densaýlyǵyna muqııat bolýy kerek. Bul qazirgi zamannyń talaby.
"Indetti jeńý ár adamnyń óziniń qolynda. Bul eń aldymen qarapaıym qaǵıdany ustanýdan bastalady. Betperde taǵyp júrý, tazalyq saqtaý jáne áleýmettik qashyqtyq ustaný óte mańyzdy. О́ıtkeni bul sizdiń jáne ózge adamdardyń densaýlyǵy úshin asa qajet. Taǵy da qaıtalap aıtamyn, "saq júrseń saý júresiń", "saqtyqta qorlyq joq". Sondyqtan azamattardy qorǵaý úshin biz barlyq qajetti sharalardy jedel túrde qolǵa aldyq jáne osy jumysty ary qaraı jalǵastyra beremiz", - dedi Prezıdent.