Qostanaıda tatar, bashqurt halyqtarynyń ulttyq meıramy – sabantoı atalyp ótti. Shekteý sharalarynyń qaıta kúısheıýine baılanysty bıylǵy dástúrli merekege jıylǵan jurt jyldaǵydaı kóp bola qoıǵan joq. Qostanaıdaǵy «Qoǵamdyq kelisim» úıiniń aýlasynda merekelik kórme uıymdastyrylyp, tatar, bashqurt halyqtarynyń ulttyq taǵamy men qolóner týyndylary sórege qoıyldy.
Uıymdastyrýshylardyń aıtýynsha, «Sabantoı» – sóziniń túp maǵynasy túrkiniń «saban», ıaǵnı «soqa» sózine kelip tireledi. Tarıhy tym tereńde jatqan ulttyq merekeni qazaqshalasaq, soqa merekesi bolyp shyǵady. Jer emgen eńbekshil jurt kóktemgi egis naýqanyn osylaı oıyn-saýyqqa ulastyrýdy dástúr etken. Iаǵnı sabantoıdy toılaýdyń astarynda egin bitik shyqsyn, jıyn-terim mol bolsyn degen halyqtyń aq tilegi men arman-muraty jatyr. Merekeniń tól emblemasy – qoldan toqylǵan kógildir aspan astyndaǵy qyzyl órnekti tatar súlgisi.
– Bizdiń óńirde sabantoı jyl saıyn kóktemgi alqap jumystary aıaqtalǵan soń, maýsym aıynyń ekinshi jartysynda toılanady. Alǵashqy jyldary tek tatar-bashqurt etomádenı birlestiginiń ókilderi ǵana bas qosatyn. Birte-birte qanatyn keńge jaıǵan sabantoı jalpyhalyqtyq sıpatqa ıe bolyp, oblysymyzda turyp jatqan san alýan ulttyń saǵyna kútetin dýmandy meıramy bolyp qalyptasty. Búginde sabantoı aımaqty mekendegen túrli ult ókilderin eńbek pen birlikke, dostyqqa úndeıtin, óskeleń urpaqty ulan-baıtaq elimizge degen súıispenshilikke tárbıeleıtin taǵylymdyq máni bar merekege aınaldy, – deıdi «Dýslyq» tatar-bashqurt etnomádenı birlestiginiń jetekshisi Rınad Bektemırov.
Qostanaılyqtar sán-saltanatqa toly dástúrli meıramnyń naqyshty kórinisteri men «Lıaısan» vokaldyq ansambliniń konsertin jergilikti telearnalar men áleýmettik jeliler arqyly tamashalady.
Qostanaı oblysy