Búgingi tańda adam kóp jınalatyn ǵımarattardyń ishi, kóshe boıy, aıaldamalar kún saıyn tazartylýda. Sanıtarlyq jumysqa 350 adam jumyldyrylǵan, - dep habarlaıdy Egemen.kz.
Halyq "Saqtansań saqtaımyn" degen sózdiń mánin áli de túsine qoımaǵan syńaıly. Kóshe boıynda betperde taqpaǵan adam kóp. Osy bir ańǵaldyq keı tusta orny tolmas ókinishke uryndyryp jatady. Elge saqtaný sharasyn buljytpaı oryndaý kerektigi de eskertilip jatyr. Jaman tumaý qaıtadan bel alǵaly oblys ortalyǵyndaǵy sanıtarlyq jumysqa erekshe mán berilip otyr. Halyq kóp baratyn mekemelerdegi saqtyq sharalary kúsheıtildi.
"Karantın kezinde bizdiń qyzmetkerlerdiń 70 prosenti óz jumystaryn jalǵastyryp jatyr. Jergilikti turǵyndar belgili bir máselelerge oraı shaǵym aıtyp keledi. Adam aıaǵy úzilmeıdi dese de bolǵandaı. Sondyqtan, ǵımarattyń ishin únemi zalalsyzdandyryp turamyz", – deıdi Kókshetaý qalalyq polısııa basqarmasy bastyǵynyń birinshi orynbasary Janat Sháripov.
Sanıtarlyq tazalaý jumystaryna Kókshetaý tehnıkalyq ınstıtýtynyń ókilderi de óz úlesterin qosýda. Oqý ordasynan arnaıy top qurylǵan. Ol topta ınstıtýttyń oqytýshylary men ofıserleri bar. Olar osy eki kúnniń ishinde 5 ǵımaratty dezınfeksııalaǵan.
Dezınfeksııalaýǵa jumyldyrylǵan jandardyń barlyǵy qajet jabdyqtarmen tolyq jaraqtandyrylǵan. Iаǵnı, qalalyq ákimshilikten 200 dezınfeksııalaý qurylǵysy men 350 arnaıy forma berilgen. Sondaı-aq, dıahlor suıyqtyǵy da jetkilikti bólinipti. Qala boıynsha zalalsyzdandyrý jumystary kúsheıtile tústi.