Gýmanıtarlyq kómektiń barlyq qaptamasyna mór qoıylyp, taýarlardyń deldaldar arqyly satylýyna múmkindik bermeıdi. Bul týraly Nur-Sultan ákimdiginiń resmı saıtyna Egemen.kz silteme jasaı otyryp habarlaıdy.
Elordanyń sybaılas jemqorlyqqa qarsy qyzmeti qoǵam belsendileriniń, arnaıy monıtorıng toby ókilderiniń, "Astana – Adaldyq alańy" jobasy menedjerleriniń, dári-dármekterdiń baǵasyn baqylaý jáne taldaý basqarmasynyń, qoǵamdyq densaýlyq saqtaý basqarmasynyń qyzmetkerlerimen birlese otyryp, Nur-Sultan qalasynda tegin gýmanıtarlyq kómektiń taratylýyna monıtorıng júrgizilýde.
Habarlanǵandaı, birqatar memleket koronavırýs ınfeksııasynan zardap shekken elderge medısınalyq kómek kórsetýge nıet bildirdi. Atap aıtsaq, elimizdiń astanasyna Reseıden 2 790 dana qorǵanys kıiminiń jıyntyǵy, 21850 dana úsh qabatty bir rettik betperde, 236 qaptama "koronovır" tabletkasy bólingen.
Qytaı Halyq Respýblıkasy 450 medısınalyq qorǵanys kıimi, 3000 hırýrgııalyq qolǵap, 15 janasýsyz ınfraqyzyl termometr, 2200 medısınalyq betperde jáne 3040 hırýrgııalyq betperde bóldi.
"Astana – Adaldyq alańy" jobasynyń jetekshisi, qalalyq máslıhat depýtaty Mıras Shekenov búginde sybaılas jemqorlyqqa qarsy is-qımyl departamentiniń basshylyǵynan, "Astana – adaldyq alańy" jobasynyń menedjerleri jáne arnaıy monıtorıng toby múshelerinen turatyn jumys toby Reseı men Qytaıdan kelgen gýmanıtarlyq kómektiń SQ "Farmasııa" qoımalarynan medısınalyq uıymdarǵa deıin jetkizilýin qadaǵalaý boıynsha jumys júrgizip jatqanyn atap ótti.
"Búgingi tańda medısına uıymdaryn jeke qorǵanys quraldary men dári-dármektermen qamtamasyz etý – karantın jaǵdaıynan shyǵýǵa múmkindik beretin shara. Esh nárseni adam ómirimen salystyrýǵa bolmaıdy. Bul jaǵdaıda memleket qalyptasqan jaǵdaıdy retteý úshin keshendi sharalar qabyldaýda. Biz, qoǵam belsendileri, gýmanıtarlyq kómekti Qazaqstanǵa kelgen sátten bastap onyń tutynýshyǵa jetýine deıin qadaǵalaımyz. Barlyq qaptamalarda qorǵanys quraldary men dári-dármekterdiń tegin gýmanıtarlyq kómekke jatatynyn bildiretin móri bolady. Bul shara josyqsyz azamattarǵa taýarlardy deldaldar arqyly satýǵa múmkindik bermeıdi", dedi sybaılas jemqorlyqqa qarsy is-qımyl departamenti janyndaǵy arnaıy monıtorıng tobynyń ókili Jánibek Ýspanov.
Osyǵan baılanysty barlyq múddeli azamattar, eger medısınalyq maqsattaǵy buıymdar men dári-dármekterde osyndaı mór bolsa, 8-775-160-55-32 nómirine habarlasa alady.