Uly aǵartýshy Ybyraı Altynsarınniń týǵan jerinde sport nysandary men medısına mekemeleri jańaryp, aýyl joldary kúrdeli jóndeýden ótip jatyr. Bıyl aýdanǵa «Aýyl – el besigi» baǵdarlamasy aıasynda 788,9 mln teńge, al «Jumyspen qamtýdyń jol kartasy» boıynsha 1 mlrd 13,9 mln teńge qarjy bólinip, jalpy sany 18 joba qolǵa alynǵan.
Aýdan ortalyǵyndaǵy 25 jyl jóndeý kórmegen eski ortalyq stadıonǵa kúrdeli jóndeý júrip jatyr. Jobanyń jalpy quny – 556,1 mln teńge.
– Jóndeý jumystary sáýir aıynyń sońyna taman bastalǵan. Jańadan jasandy kógal tóselip, jańa trıbýna turǵyzyldy. Kórermenderge arnalǵan aǵash oryndyqtardyń ornyna 848 plastık oryndyq qoıylady. Odan soń, sport kesheniniń janyndaǵy jabyq ǵımarat keńeıtilip, tóreshilerge arnalǵan bólme, sportshylar sheshinip, kıim aýystyratyn, jýynatyn oryndar, bólmeler salynady. Bir-birine irgeles ornalasqan Úlken Chýrakov, Obaǵan, Sılantev, Sherbakov sııaqty aýyldarǵa ortaq bul stadıon – balalar-jasóspirimder sport mektebiniń balansynda. Sondyqtan, qaıta jańǵyrtýdan ótken jańa stadıonda aldymen osy sport mektebiniń tárbıelenýshileri jattyǵatyn bolady. Qazir sport mektebinde 500-ge jýyq jas sportshy voleıbol, fýtbol, tennıs, jeńil atletıka, kúres túrleri, boks synyptarynda tárbıelenip jatyr. Sońǵy jyldary aýylda jastardyń sany artyp keledi. Sondyqtan bıyl salynyp jatqan sport kesheniniń bolashaq aýdan sportyn damytýda mańyzy zor dep bilemin. Munyń syrtynda, aýyldaǵy eresek adamdarǵa da esik ashyq bolady. Aýdan ortalyǵynyń turǵyndary jumystan soń, ásirese, voleıbol, fýtbol oınaýdy dástúrge aınaldyrǵan, – dedi aýdandyq dene tárbıesi jáne sport bóliminiń basshysy Serik Janaqaev.
Aýdan ákiminiń orynbasary Janat Jıenbaevtyń aıtýynsha, merdigerler jumysty bıyl qazan aıynda aıaqtaýdy josparlap otyr. Munyń syrtynda, Sılantevte 6 kóshege ortasha jóndeý jumystary júrgizilip jatyr. – Bul kóshelerdiń barlyǵy buryn sońdy durys jóndeý kórmegendikten, tozyńqyrap ketip edi. «Aýyl – el besigi» baǵdarlamasy boıynsha bıyl oblys bıýdjetinen 75,8 mln teńge qarjy bólinip otyr. Osy arqyly ortalyq kósheler edáýir keńeıtilip, jol shetine jaıaý júrginshilerge arnalǵan trotýar tóseledi. Kóshe men trotýardyń arasyna sýaǵar qoıylyp, trotýarǵa zamanaýı tabantas tóseledi. Bul sharýanyń bári kelisimshart boıynsha «Tanar» JShS-na júktelip otyr. Seriktestik shildeniń basynda jumysqa kirisip ketti. Qazir karantın rejimine baılanysty qıyndyqtarǵa qaramastan, kúzge deıin alty kóshe birdeı jóndeýden ótip, mezgilinde tapsyrylýy tıis. Sondaı-aq Obaǵan aýylyndaǵy 2 uzyn kóshe ońdalyp jatyr. Bul kóshelerge bólingen qarjy kólemi – 89,9 mln teńge. Munda «Elıt Plast» seriktestigi jumys isteýde. Bul seriktestiktiń esepshotyna keshe ǵana 27 mln teńge aýdardyq, kúzge qaraı tolyq esep aıyrysyp, jumysty qabyldap alamyz, – dedi ákim orynbasary.
«Jumyspen qamtýdyń jol kartasy» baǵdarlamasy aıasynda aýdan turǵyndary úshin 253 jańa jumys ornyn ashý josparlanǵan. Búginge deıin 189 adam eńbekpen qamtylyp otyr. Solardyń biri Sılantev aýylynyń turǵyny – Sergeı Arhıpov. Qostanaıda joǵary bilim alyp jatqan stýdent qazir jazǵy demalysta júrgenimen, úıinde qarap jatpaı jumysqa ornalasýdy jón kóripti. – Qazir pandemııaǵa baılanysty qalada jumys oryndary azaıyp ketti. Sodan aýylǵa kelgen soń, jumyspen qamtý ortalyǵyna bardym. Olar ortalyq stadıon qurylysyna jumysshy kerektigin aıtty. Kelisimshart boıynsha beriletin aılyǵy da táýir, – dedi S.Arhıpov.
Aýdanda qolǵa alynǵan ıgi jobanyń biri – Sılantev pen Obaǵan aýylynyń arasyn jalǵaıtyn jaıaý júrginshige arnalǵan trotýar. Irgeles jatqan bul eki eldi mekenniń arasyna jaıaý qatynaıtyn halyq kóp. Jaıaý adam úshin, ásirese, qystyń borandy kúnderi jol qatynasy qıyndaıdy. Keshkilik jumystan qaıtqan turǵyndarǵa, ásirese, mektep jasyndaǵy balalarǵa kúre jol ústimen tolassyz aǵylyp ótip jatqan avtokólikter úlken qaýip týǵyzyp kelgen. Byltyr aýyl turǵyndary oblys ákimine osy jol aralyǵyn jaryqtandyryp, qol ushyn berýdi suraǵan edi. Bıyl eki aýyldyń arasyndaǵy joldyń boıyna jaıaý adamdarǵa uzyndyǵy 3 shaqyrym, eni 1 jarym metr bolatyn arnaıy trotýar tóselip, ony jaryqtandyrý jumystary júrip jatyr. Bul jobanyń quny 87,9 mln teńge. Trotýardy «Baqyt K» seriktestigi tósep jatyr. Qazir 45 mln teńge ıgerildi», dedi J.Jıenbaev.
Altynsarın aýdanynda júzege asyrylyp jatqan aýqymdy jobalar qazirgideı kúrdeli kezeńde aýyl turǵyndarynyń ýaqytsha bolsa da jumysqa turyp, tabys tabýyna múmkindik berip otyr. Aýdan ákimdigi men merdigerler arasyndaǵy kelisimshart boıynsha ár jobany júzege asyrýǵa jumyldyrylǵan jumys kúshiniń 50 paıyzy – jergilikti turǵyndar. Al olarǵa tólenetin eńbekaqynyń eń tómengi mólsheri 85 myń teńgeden bastalady.
Qostanaı oblysy,
Altynsarın aýdany,
Sılantev aýyly