Elimizde indetke qatysty máselelerdi júıeli túrde sheshý jalǵasyp jatqanda joǵary oqý oryndary da qol qýsyryp qarap otyrmaı, qıyn jaǵdaıǵa tap bolǵan, kómekti qajet etetin qyzmetkerlerine óz deńgeıinde qoldaý kórsetýde. Mysaly, Túrkistandaǵy Q.A.Iаsaýı atyndaǵy Halyqaralyq qazaq-túrik ýnıversıteti basshylyǵy, kásipodaq uıymy jáne oqý ornynyń klınıka-dıagnostıkalyq ortalyǵy birlese «Jol kartasyn» júzege asyrýda.
Iаǵnı jol kartasy aıasynda klınıkanyń jáne medısına fakýltetiniń dárigerlerinen top qurylyp, naýqastanǵan qala turǵyndary men ýnıversıtet qyzmetkerlerine onlaın-keńes berýde. Qyzmetkerlerge dári-dármek satyp alýǵa kásipodaq uıymy qarjylaı qoldaý kórsetedi. Osy maqsatta bekitilgen hattamaǵa sáıkes antıbıotıktermen pnevmonııany emdeýdiń 200 kýrsyna jetkilikti qarajat bólingen. Ýnıversıtet klınıkasynda qyzmetkerlerge aqysyz negizde pnevmonııany anyqtaý úshin kompıýterlik tomografııamen tekserý júrgizilýde jáne qajet bolǵan jaǵdaıda emdelýi úshin klınıkanyń provızorlyq bólimine jatqyzylýda. Sondaı-aq ýnıversıtet klınıkasy men «AI» medısınalyq ortalyǵynda ambýlatorııalyq emdeý uıymdastyrylǵan. Munda oqytýshylar men qyzmetkerlerdiń tıisti prosedýralardan ótýine múmkindik jasalǵan.
«Biz dıagnostıka men emge muqtaj barlyq qyzmetkerlerdi qamtamasyz etýdemiz. Sonymen qatar ýnıversıtettiń kásipodaq uıymy tarapynan pnevmonııadan jazylyp shyqqan oqytýshylar men qyzmetkerlerdiń elimizdiń eń jaqsy shıpajaılary men demalys úılerinde ońaltýdan ótýi úshin 300 joldama berý máselesi sheshimin taýyp otyr. Jumyla kúresý arqyly ǵana koronavırýstyq pandemııany toqtatyp, onyń qaıtalanýyna qarsy qalqan bola alamyz. Dúrbeleń men emosııaǵa jol bermeýimiz kerek. Áleýmettik jelilerde kóptegen jalǵan aqparattyń jıi taratylatynyn eskere otyryp, qyzmetkerlerimizdi, stýdentterimizdi tek resmı aqparattardy qoldanýǵa shaqyrdyq», deıdi Q.A.Iаsaýı atyndaǵy Halyqaralyq qazaq-túrik ýnıversıtetiniń rektory Bolatbek Abdrasılov.
Qoldan kelgen barlyq múmkindikti jasap jatqan ýnıversıtet basshylyǵyna rızashylyǵyn bildirgen oqý orny ujymy bul qıyndyqty abyroımen jeńetinderine senimdi.
Túrkistan oblysy