Olar qalanyń jasyl beldeýindegi aǵashtarǵa kútim jasaıdy. Bul týraly elorda ákimdiginiń resmı saıtyna silteme jasaı otyryp Egemen.kz habarlaıdy.
Búgingi tańda "Astana Ormany" JShS 120-dan astam adamdy jumyspen qamtyp otyr.
"Astana Ormany" JShS-de jastar qala mańyndaǵy jasyl beldeýde (onyń 11 502,2 gektaryna ekpe aǵashtar otyrǵyzylǵan) jáne qala aýmaǵynda eńbek etýde. Olar 275 350 dana tal men kóshetterdi – súıeldi qaıyń, usaq japyraqty shegirshin, qaraǵaı, kóde, boz jıde, terek aǵashtary men kóshetterdi qopsytý jáne sýarýmen aınalysady.
Bul aǵashtarǵa kútim jasaý arqyly jastar tabıǵat pen qala kelbeti úndestik tapqan biregeı ekojúıeniń qalyptasýyna óz úlesterin qosyp keledi. "Astana Ormany" JShS mekemesinde jastar 90 myń tenge jalaqyǵa qosa "Jasyl el" jobasynan arnaıy bólingen 35 394 tenge syıaqyǵa ıe bolyp, óz eńbekterin jalǵastyrýda", dedi qalalyq jastar saıasaty máseleleri basqarmasynyń basshysy Dáýlet Káribek.
Qazirgi ýaqytta "Jasyl El" jobasy aıasynda jastar úsh sanatta jumys jasaýda. Atap aıtqanda, 14 pen 17 jas aralyǵyndaǵy kóp balaly jáne az qamtylǵan otbasylardyń jastary, 17-22 jas aralyǵyndaǵy stýdentter jáne odan úlken top, ıaǵnı 18 ben 29 jas aralyǵyndaǵy jumyssyzdar. Jalpy, jarty jyldyń qorytyndysy boıynsha "Jasyl el" jobasy aıasynda 1087 jas jumysqa ornalastyryldy.