Elimizge Úndistan men Reseıden jetkizilip jatqan dári qorynyń qomaqty úlesi Tobyl óńirine de jetti. Osydan keıin aımaqta dárihana qoımalaryn qajetti dári-dármekke toltyrý máselesi de rettele bastady.
Aýadaı qajet antıbıotıkterdiń aımaqqa jetkizilgenine 2-3 kún boldy. Áleýmettik mańyzy zor preparattardyń ishinde ishki bulshyq etke dári salý úshin eritindi daıyndaýǵa arnalǵan 58 myń quty seftrıakson, 36,5 myń sefazolın, 20 myń qaptama asetılın, 3 myń qaptama tamıflý men teraflıý, sondaı-aq em alyp jatqan naýqastardyń qany uıyp qalmaý úshin qoldanylatyn 200 qaptama kleksan dárisi bar.
«Stofarm» seriktestiginiń kommersııalyq dırektory Sergeı Atkınniń aıtýynsha, sheteldik dáriler bir táýliktiń ishinde oblystyń barlyq dárihanasyna taratylyp, saýdaǵa shyǵaryla bastaǵan.
– Búginde turǵyndar úshin azıtromısın dárisi de qoljetimdi ekenin aıta ketý kerek. Qorda barlyǵy 6 myń qaptama bar. Sondaı-aq vırýsqa qarsy groprınosın dep atalatyn dáriniń 3,5 myń qaptamasy taratylýda. Qazir dári-dármekterdi aımaqtaǵy 300-ge jýyq dárihanaǵa barynsha tezirek taratyp berýge kúsh salýdamyz. Áıteýir halyqqa dári tapshylyǵyn sezdirmeý úshin qoldan kelgenniń bárin istep jatyrmyz, – dedi S. Atkın.
Munyń syrtynda, aımaqtaǵy iri dárihana jelilerine qarjylaı qoldaý kórsetile bastady. О́tkende ǵana oblys ákimi Arhımed Muhambetov kóterme saýda fırmalary men iri dárihana júıeleriniń basshylarymen kezdesti. Kezdesý barysynda dárihana júıelerine qaıtarymdy qarjylaı kómek berý týraly sheshim qabyldanǵan.
– Bul maqsatqa birden 300 mln teńge bólinip, dárihanalarǵa oblys turǵyndaryn asa zárý dárilermen qamtamasyz etý mindeti júktelip otyr. Onyń qataryna qyzý túsiretin, vırýsqa qarsy qoldanylatyn preparattar, sondaı-aq qan qoıýlanýyn tejeıtin antıbıotıkter jatady. Dárihana ıeleri qaryzǵa berilgen qarjyny eshbir ósimaqysyz jyl sońyna deıin qaıtaryp bere alady, – dedi Taýarlar jáne kórsetiletin qyzmetterdiń sapasy men qaýipsizdigin baqylaý departamentiniń basshysy Oral Bekmaǵambetov.
Densaýlyq saqtaý basqarmasynyń málimetinshe, taıaý kúnderi oblysqa Reseıden shyqqan dári-dármektiń jańa legi kelip jetýi tıis. Áleýmettik mańyzy bar bul dárilerdiń bári turmysy tómen otbasylarǵa taratylyp beriledi.
Qostanaı oblysy