A.Baıtursynov atyndaǵy ýnıversıtet pen О́.Sultanǵazın atyndaǵy pedagogıka ýnıversıteti qosylyp, endi Ahmet Baıtursynov atyndaǵy Qostanaı óńirlik ýnıversıteti dep atalatyn boldy. Taıaýda ǵana bilim ordasynyń basshylyǵy onlaın-brıfıng ótkizip, bir jylǵa sozylǵan birigýdiń sońǵy núktesi qoıylǵanyn málim etti.
О́kinishtisi, Qostanaıdaǵy kózi qaraqty qaýym kemeńgerdiń aty-jónin Baıtursynov emes, Baıtursynuly dep jazǵan durys bolatynyn aıtqaly 20 jyl ótti. Biraq eldiń esti sózine ýnıversıtet basshylyǵy qulaq asar emes. Bul joly da qaperine almapty. Áıtpese, eki JOO qosylyp, búkil qujat aýysyp jatqan sátte bir tıyn shyǵyndamaı-aq «-ov»-ty alyp tastap, ornyna op-ońaı «uly»-ny qoıa salýǵa bolatyn edi.
Esterińizge sala ketsek, Almatydaǵy til bilimi ınstıtýty Baıtursynov emes, Baıtursynulynyń atynda. El astanasynda da Baıtursynuly kóshesi bar. Alash ardaqtysynyń ózi de kózi tirisinde 1925 jyldarǵa deıin jeke qujattary men eńbekterine «Baıtursynuly» dep jazyp kelgeni tarıhtan málim.
Endeshe, bári «uly» dep jazyp jatqanda, Ahańnyń týǵan jerindegi ýnıversıtet «-ov»-tan nege aıyrylǵysy kelmeı otyr?..
QOSTANAI