Almatyǵa Dúnıejúzilik densaýlyq saqtaý uıymynan gýmanıtarlyq kómek maqsatynda maska, medısınalyq halattar men respıratorlar jetkizildi, - dep jazady Egemen.kz
Júk Almaty qalasy Sybaılas jemqorlyqqa qarsy qyzmetiniń qatysýymen suryptalyp, adresattarǵa jiberildi. Gýmanıtarlyq júkterdi túsirý jáne qabyldaý prosesine Qazaqstan Respýblıkasy Sybaılas jemqorlyqqa qarsy is-qımyl agenttiginiń ókilderi, qalanyń qoǵam qaıratkerleri jáne "Akselerator dobra - Izgilik Elshisi" eriktiler qozǵalysynyń jetekshisi, Abaı atyndaǵy QazUPÝ Sorbonna-Qazaqstan ınstıtýtynyń dırektory Aınur Sábıtova qatysty.
Abaı atyndaǵy QazUPÝ eriktileri júkterge "Besplatno - Tegin" degen belgisi bar mórler qoıdy. Ári qaraı belsendiler gýmanıtarlyq júktiń adresattarǵa jetkizilýine monıtorıng júrgizetin bolady.
Almaty qalasynda karantın kezeńinde Abaı ýnıversıtetiniń eriktileri sanıtarlyq-epıdemıologııalyq normalardyń saqtalýyna monıtorıng júrgizý boıynsha is-sharalarǵa da qatysty. Monıtorıng toby - Sybaılas jemqorlyqqa qarsy qyzmet jáne Almaty qalasy Ishki ister departamentiniń ókilderi, "Izgilik elshisi" eriktileri, Arnaıy baqylaý toptarynyń qoǵamdyq belsendileri qoǵamdyq tamaqtandyrý kásiporyndaryna (kafeler, meıramhanalar jáne t.b.) reıd júrgizdi. Osy reıd barysynda keıbir mekemelerde tártip buzýshylyq, karantın normalarynyń saqtalmaýy, dálirek aıtqanda, saǵat 23:00-den keıin jumys isteýi anyqtaldy. Osy faktiler boıynsha aktiler jasalyp, ýchaskelik polısııa qyzmetkerleri shaqyryldy. Qoǵamdyq belsendiler halyq arasynda túsindirý jumystaryn júrgizdi.
Bul aksııa bir ret emes jáne barlyq karantın kezeńinde quqyq qorǵaý organdarymen júrgiziletin bolady.
Barlyq sanıtarlyq - epıdemıologııalyq normalardy, maskalyq rejımdi saqtaý, adamdardyń jınalýyn boldyrmaý-osynyń barlyǵy pandemııamen kúreste mańyzdy faktor bolyp tabylatynyn eske salamyz.