Jumyspen qamtýdyń 2020-2021 jyldarǵa arnalǵan jol kartasy aıasynda 6 295 jobany iske asyrý bastalyp, olar boıynsha 148 myń jumys orny quryldy. Bul týraly Eńbek jáne halyqty áleýmettik qorǵaý mınıstrligi habarlady, - dep jazady Egemen.kz
JQJK aıasynda jergilikti atqarýshy organdar iske asyrý úshin 6 696 jobany iriktep aldy.
JQJK ınfraqurylymdyq jobalaryn iske asyrý 4 negizgi baǵyt boıynsha ótedi:
– áleýmettik-mádenı nysandardy kúrdeli jáne aǵymdaǵy jóndeý, rekonstrýksııalaý jáne salý;
– turǵyn úı-kommýnaldyq sharýashylyq nysandaryn kúrdeli, ortasha jáne aǵymdaǵy jóndeý, rekonstrýksııalaý;
– ınjenerlik-kólik ınfraqurylymyn kúrdeli, ortasha jáne aǵymdaǵy jóndeý, rekonstrýksııalaý jáne salý;
– eldi mekenderdi abattandyrý.
JQJK ınfraqurylymdyq jobalaryn iske asyrý kezinde otandyq óndirýshilerdiń keminde 90% taýarlary men qyzmetterin qoldanýdy qamtamasyz etý erekshe shart bolyp tabylady. Jumysshylardyń kem degende jartysy halyqty jumyspen qamtý ortalyqtary arqyly alynyp, basymdyq jumyssyz júrgen jastarǵa beriletin bolady. Merdigerler sanıtarlyq-epıdemıologııalyq sharalardy qoldana otyryp, qaýipsiz eńbek jaǵdaıyn qamtamasyz etýge tıis.
15 shildedegi jaǵdaı boıynsha óńirlerde 6 295 joba boıynsha jumys bastaldy, 148 myńnan astam jumys orny quryldy, onyń ishinde halyqty jumyspen qamtý ortalyqtary arqyly 77 myń adam jumysqa ornalasty.
JQJK aıasynda barlyǵy 255 myń jumys ornyn ashý josparlanýda. Bul rette JQJK jobalary bolashaqta 100 myńnan astam turaqty jumys ornyn ashýǵa negiz bolady.
Esterińizge sala keteıik, 14 mamyrda QR Prezıdentiniń tapsyrmasyna sáıkes Jol kartasyna kelesi ózgerister engizildi:
– jergilikti atqarýshy organdar ınfraqurylymdyq jobalardy iske asyrý sheńberinde aqparattyq-túsindirý jumystaryn júrgizý, jumyskerlerdi medısınalyq tekserý, jınaý jáne jumys ornyna deıin tasymaldaý úshin mobıldi rekrýttik pýnktter uıymdastyrýdy qamtamasyz etýge tıis;
- ınfraqurylymdyq jobalardy iske asyrýǵa qatysý úshin halyqty jumyspen qamtý ortalyqtary jibergen, basqa eldi mekenderden kelgen jumyssyzdarǵa tıisti qarjy jylyna arnalǵan respýblıkalyq bıýdjet týraly Zańmen belgilengen eki eń tómengi jalaqy mólsherinde birjolǵy materıaldyq kómek («kóterme») berilýge tıis.
Budan basqa, ortalyq jáne jergilikti atqarýshy organdardyń, sondaı-aq JQJK iske asyrýǵa jaýapty uıymdardyń qyzmetin úılestirý úshin halyqty jumyspen qamtý máseleleri jónindegi vedomstvoaralyq komıssııa (budan ári-VAK) quryldy. VAK otyrystarynyń sheńberinde óńirler jáne respýblıkalyq bıýdjettik baǵdarlamalar ákimshileri bólinisinde qarjylandyrý lımıtterin aıqyndaý boıynsha usynystar ázirlendi, JQJK sheńberinde ınfraqurylymdyq jobalardyń tizbesi qaraldy jáne bekitildi.