Petropavlda polıseı tórt mıllıon teńgeden astam aqshany jymqyrǵan uryny “izin sýytpaı” ustady, – dep habarlaıdy Polisia.kz.
22 shildede saǵat 10 shamasynda “Korona” saýda úıiniń mańynda ury Petropavl turǵynynyń qolynan aqsha salynǵan paketti julyp alyp, úılerdiń arasymen qasha jónelgen. Abdyrap qalǵan áıeldiń kómek suraǵan daýsyn qalalyq patrýldik polısııa batalony ekıpajynyń qyzmetkerleri estıdi. Qyzmet ınspektory Asqar Tatanov aýlalardyń birinde jasyrynbaq bolǵan urynyń sońynan júgirdi. Qýǵynshyny baıqaǵan qaskóı qolyndaǵy paketin laqtyra salyp, jasyrynbaq boldy. Alaıda, polısııa qyzmetkeri qýyp jetip, ony kelgen jedel-tergeý tobyna tapsyrdy. Tórt mıllıon teńgeden astam bolǵan paket birden ıesine qaıtaryldy.
"Men abyrjyp qaldym. Oqıǵa oryn alǵanda, olardyń sońynan júgire ketippin. Keıin polısııaǵa habarlasý kerek qoı dep oıladym. Keri júgirdim. Áıelder óz telefonymnan polısııaǵa habarlasýǵa járdemdesti. Polıseılerge alǵysym sheksiz", – dep tártip saqshylarynyń úılesimdi jáne jedel áreketterin atap ótip, qala turǵyny óz rızashylyǵyn bildirdi.
Tonaý faktisi boıynsha QR QK 191-baby 3-bóligi boıynsha sotqa deıingi tergeý júrgizilip jatyr. Ustalǵan adamnyń buryn birneshe ret sottalǵany anyqtaldy. Qazirgi ýaqytta Petropavldyń 34 jastaǵy turǵyny ýaqytsha ustaý ızolıatoryna qamaldy.