Sanıtarlyq-epıdemıologııalyq jaǵdaıdy turaqtandyrý sharalary arqyly COVID-19 juqtyrýdyń táýliktik ósimi 4%-dan 2,1%-ǵa deıin qysqardy, - dep habarlaıdy Egemen.kz QazAqparatqa silteme jasap. Bul týraly QR Densaýlyq saqtaý mınıstrligi málimdegen.
Sonymen birge, koronavırýstan saýyqqan naýqastar úlesi 60%-dan asqan.
"Biz COVID-19 aýrýyn birtindep azaıtyp kelemiz. Endi bir rettik medısınalyq úsh qabatty maskanyń bólshek saýda baǵasy 85 teńgeni quraıdy. Qyrkúıek aıyna deıin alǵy sheptegi qyzmetkerler úshin jeke qorǵanys quraldarynyń rezervi quryldy. Qosymsha 41 mln maska, 27 mln qolǵap, 379 myń qorǵanysh kostıýmderi jáne 1,2 mln PTR-test satyp alyndy", - dep habarlady mınıstrliktiń baspasóz qyzmeti.
Qazirgi ýaqytta zerthanalardyń ótkizý qabileti jedel qarqynmen artyp keledi. Táýligine 32 myń test ótkize alatyn 59 memlekettik jáne jeke zerthana iske qosyldy. 1 tamyzǵa qaraı ótkizý qabileti táýligine 35,6 myń adamǵa, 1 qyrkúıekke deıin – táýligine 64 myńǵa adamǵa deıin jetedi.
"Qazirgi ýaqytta ınfeksııalyq jáne emdeý stasıonarlarynda 1 958 ókpeni jasandy jeldetý apparaty bar, ákimdiktermen birlesip 4 183 qosymsha apparat jáne pasıentterdi ottegimen qoldaýdy qamtamasyz etý úshin 21 myńnan astam ottegi konsentraty men medısınalyq gazben jabdyqtaý júıesi satyp alyndy. Osylaısha, qabyldanǵan keshendi sharalar medısınalyq kómektiń sapasyn aıtarlyqtaı arttyrýǵa múmkindik beredi", - deıdi Densaýlyq saqtaý mınıstrligi.