Ortalyq saılaý komıssııasynyń kezekti otyrysy ótip, onda Senat depýtattaryn saılaý naýqanyna qatysty birqatar másele qaralyp, úmitkerlerdi tirkeý qorytyndylary jarııalandy.
Odan bólek qatysýshylar saılaý bıýlletenderin daıyndaý jáne saılaýda shet memleketterdiń, halyqaralyq uıymdardyń baıqaýshylary, sheteldik buqaralyq aqparat quraldary ókilderi qyzmetiniń keıbir máselelerin talqylady. Kandıdattardy tirkeý qorytyndylary týraly aýmaqtyq saılaý komıssııalarynyń tóraǵalary baıandady.
23 shilde saǵat 18.00-degi jaǵdaı boıynsha oblystardyń, Nur-Sultan, Almaty jáne Shymkent qalalarynyń saılaý komıssııalary Qazaqstan Respýblıkasy Parlamenti Senaty depýtattarynyń 17 mandatyna usynylǵan 94 adamnyń ishinen 58 kandıdatty tirkedi. Ortasha eseppen bir orynǵa 3 úmitkerden keledi. О́ńirler arasynda eń kóp kandıdat Nur-Sultanda jáne Aqmola oblysynda 5 adamnan tirkelgen. Kandıdattardyń 48-i (82,8%) er, al 10-y (17,2%) áıel.
Ortalyq saılaý komıssııasynyń tóraǵasy Berik Imashev áıelderdiń belsendi ekenin atap ótti. Olardyń paıyzdyq kórsetkishi – 17,2. Bul ótken saılaý naýqanymen salystyrǵanda 2 ese joǵary. Mamandyqtar boıynsha 19 ınjener, 13 ekonomıst, 8 pedagog, 7 agrarlyq sala qyzmetkeri, 5 dáriger, 3 zańger, 1 saıasattanýshy jáne 2 basqa sala qyzmetkeri tirkelgen. 23 shildede saǵat 18.00-den bastap Senat depýtattyǵyna tirkelgen barlyq kandıdattar saılaý aldyndaǵy úgit jumystaryn bastap ketti, ol 11 tamyz kúngi saǵat 00.00-ge deıin jalǵasady.
Al OSK hatshysy Sabıla Mustafına saılaý bıýlletenderin ázirleýge qatysty baıandama jasady. Komıssııa qabyldaǵan «2020 jyly 12 tamyzǵa taǵaıyndalǵan Qazaqstan Respýblıkasy Parlamenti Senaty depýtattarynyń saılaýyna saılaý bıýlletenderin daıyndaý týraly» qaýlyǵa sáıkes oblystyq, Nur-Sultan, Almaty, Shymkent qalalyq komıssııalaryna tıisti ákimshilik-aýmaqtyq birliktiń saılaýshylar sanyna sáıkes bıýlletender daıyndaý tapsyryldy.
Komıssııa múshesi Serik Sydyqov Ortalyq saılaý komıssııasy Qazaqstan Respýblıkasynyń Bas memlekettik sanıtarlyq dárigerimen birlesip saılaýdy ótkizý kezinde koronavırýstyq ınfeksııanyń taralýynyń aldyn alý boıynsha usynymdar ázirlep, qol qoıǵanyn habarlady. Jalpy saılaý prosesiniń sanıtarlyq qaýipsizdigin qamtamasyz etý boıynsha negizgi sheshimderdi oblystar, respýblıkalyq mańyzy bar qalalar men astananyń aýmaqtyq saılaý komıssııalary Bas memlekettik sanıtarlyq dárigerlermen birlesip qabyldaıtyny aıtyldy.
Al shet memleketter men halyqaralyq uıymdardyń baıqaýshylary Syrtqy ister mınıstrliginiń usynysy boıynsha akkredıtteledi. Sheteldik BAQ ókili Syrtqy ister mınıstrligi bergen akkredıtteý týraly kýáligi bolǵan jaǵdaıda saılaýdy baqylaı alady.