Premer-Mınıstri Asqar Mamınniń tóraǵalyǵymen ótken Úkimettiń selektorlyq otyrysynda jańa 2020-2021 oqý jylynyń bastalýyna daıyndyq máselesi qaraldy, - dep habarlaıdy Egemen.kz
Atqarylyp jatqan jumystar týraly QR bilim jáne ǵylym mınıstri A. Aımaǵambetov, QR sıfrlyq damý, ınnovasııalar jáne aeroǵarysh ónerkásibi mınıstriniń mindetin ýaqytsha atqarýshy B. Mýsın, Batys Qazaqstan oblysynyń ákimi Ǵ. Esqalıev, Soltústik Qazaqstan oblysynyń ákimi Q. Aqsaqalov, Qaraǵandy oblysynyń ákimi J. Qasymbek baıandady.
2020-2021 oqý jylynda Qazaqstannyń 7 391 mektebinde 3,3 mln-nan astam adam, onyń ishinde 1 synypta 396 myńnan astam bala bilim alady. Qazirgi jaǵdaıda oqý jylynyń birinshi toqsany qashyqtan ótedi. Oqytýdyń dástúrli formaty barlyq sanıtarlyq normalardy qatań saqtaı otyryp, tek shaǵyn formattaǵy mektepterde, sondaı-aq bastaýysh mekteptiń «kezekshi» synyptarynda saqtalady.
Úkimet basshysy oqytý ádistemesin tolyq pysyqtap, bıylǵy 20 tamyzǵa deıin aldaǵy oqý úrdisi týraly tolyq aqparat bere otyryp, onlaın rejımde respýblıkalyq ata-analar jınalysyn uıymdastyrýdy tapsyrdy.
"Úkimet asa muqtaj otbasylardyń balalaryna paıdalaný úshin shamamen 500 myń kompıýter berýdi qamtamasyz etedi. Sondaı-aq ákimdikter jergilikti deńgeıde kompıýter tehnıkasymen qamtamasyz etý máselesin pysyqtasyn", — dedi A. Mamın.
Premer-Mınıstr Bilim jáne ǵylym mınıstrligine ákimdiktermen birlesip, osy jyldyń 25 tamyzyna deıin oqýshylar men pedagogterdiń oqý jylynyń qashyqtan bastalýyna tolyq daıyn bolýyn, muǵalimderdiń tıisti oqýdan ótkizilýin, ınternet-platformalarda jáne teledıdarda qajetti kontenttiń tolyq kólemde daıyndalýyn qamtamasyz etýdi tapsyrdy.
Oqýlyqtar 25 tamyzǵa deıin beriledi. Oqýlyqtardyń qaǵaz júzindegi nusqalarynyń bárinde mindetti túrde elektrondyq nusqalary bolýy tıis, olar qoljetimdi bolýy qajet.
Sıfrlyq damý mınıstrligine ákimdiktermen jáne baılanys operatorlarymen birlesip, bilim berý resýrstarynyń qoljetimdiligi men ornyqtylyǵyn, sondaı-aq eldi mekenderde ınternettiń sapasy men jyldamdyǵyn qamtamasyz etý tapsyryldy.
Ákimdikter men Densaýlyq saqtaý mınıstrligine oqytýdy dástúrli ashyq túrde jalǵastyratyn bastaýysh mekteptiń «kezekshi» synyptarynda jáne shaǵyn mektepterde sanıtarııalyq-epıdemıologııalyq normalardy qatań saqtaý boıynsha barlyq qajetti sharalardy qabyldaý tapsyryldy.