Qazirgi karantın kezinde dúkender jabyq bolyp, adamdardyń taýarlardy ózderi ala almaıtynyn bilgen ınternet-alaıaqtar da jańa ádister tapqan. Olar Instagram jelisine taýarlar arzandatylyp satylýda nemese jeńildikter beriledi degen mazmundaǵy habarlandyrýlar berip, ótirik sýretterdi kórsetip, ańqaý adamdardy aldap túsirýde. Sonyń biri jýyrda Petropavl qalasynda boldy.
Ańqaý boıjetken aldamysh habarlandyrýǵa senip, qundyz ton ala qoımaq bolyp, «aldyn ala tóleýge tıisti» 85 myń teńge aqshasyn aýdaryp jibergen. Aqsha ketken boıynda baılanys ta sap úzilipti. Boıjetken eki kózinen jasyn saýlatyp, polısııaǵa qaırylǵan. Sóıtse, mundaı shaǵymdar polısııada óte kóp eken. Jyl basynan beri oblys polıseıleri ondaıdyń 42 –sin ashypty.
Soltústikqazaqstandyq polısııa mamandary ınternet-alaıaqtardyń birneshe túrli ádisi baryn turǵyndarǵa jetkizýde. Sonyń ishindegi eń kóp taraǵany osy – taýar baǵasyna aldyn ala tólem jasatý eken. Sondaı-aq «banktenbiz» dep qońyraý shalyp, shaǵyn nesıe áperemiz degen aldaý arqyly bank shotyna qol jetkizý de kóp taraǵan aılanyń biri. Jeke qujattardy nemese qujattardyń kóshirmelerin qolǵa túsirgen qaskóıler shaǵyn nesıe resimdeıdi. Kóp jaǵdaıda bul jábirlenýshilerdiń tanystary bolyp jatady, alaıaqtar onyń kartalaryna aqsha túsetinin alǵa tartyp, belgili bir sebeptermen kartalaryn paıdalana almaıtyndyqtan jábirlenýshiden onyń kartasynyń nómirin aıtyp jiberýdi ótinedi. Jábirlenýshiler kelip túsken aqshanyń ózine resimdelgen shaǵyn nesıe ekenin bilmeı, túsken aqshany alaıaqtarǵa berip jiberedi, al tóleý mindeti ózinde qalady.
Alaıaqtyqtyń taǵy bir ádisi aldaıtyn adamyna «banktenbiz» dep qońyraý shalyp, bireýdiń onyń shotyna «buzyp kirgendigin» habarlaý. Keıin qylmyskerler sms arqyly keletin kodty aıtýyn suraıdy. Shyn máninde bul bir rettik parol, ol alaıaqtarǵa shotqa qol jetkizýge múmkindik beredi. Mundaıda abyrjymaý kerek. Árqashanda bank qyzmetkerleri jeke jáne qarjy týraly aqparatty talap etpeıtinin este saqtaǵan jón. Sondyqtan bank bólimshesine ne call-ortalyǵyna júgingen durys. Eger siz ınternet-alaıaqtardyń arbaýyna túsip qalsańyz, tez arada polısııaǵa júginińiz, deıdi polısııa qyzmetkerleri. Osynyń bári olar turǵyndarǵa taratqan jadynamada da jazylǵan.
PETROPAVL