Mádenıet jáne aqparat mınıstrligi jyl saıyn túrli festıvalder men baıqaýlar uıymdastyrady. Sahnalarda saltanat quryp jatatyn san alýan óner janrlaryn qamtıtyn osyndaı baıqaýlardyń biregeıi – Baqytjan Baıqadamov atyndaǵy respýblıkalyq konkýrsy márege jetti.
Mádenıet jáne aqparat mınıstrligi jyl saıyn túrli festıvalder men baıqaýlar uıymdastyrady. Sahnalarda saltanat quryp jatatyn san alýan óner janrlaryn qamtıtyn osyndaı baıqaýlardyń biregeıi – Baqytjan Baıqadamov atyndaǵy respýblıkalyq konkýrsy márege jetti.
Almaty qalasynda Jambyl atyndaǵy Qazaq memlekettik fılarmonııasynda ótken eki kúndik baıqaýda respýblıkamyzdyń ár shalǵaıynan iriktelgen kásibı hor ujymdary men oqý oryndarynyń hor ujymdary sheberlikterin sarapqa saldy.
Bir jaǵy eldegi hor óneriniń oryndaýshylyq deńgeıin shyńdaı otyryp, kórnekti qazaq kompozıtory, Qazaqstandaǵy kásibı mýzyka óneriniń negizin qalaýshylardyń biri, QazKSR eńbek sińirgen óner qaıratkeri B.Baıqadamovtyń shyǵarmashylyǵyn keńinen nasıhattaıtyn baıqaýdyń bıylǵy basty júldesine Ońtústik Qazaqstan oblystyq opera jáne balet teatry laıyq dep tabyldy. Birinshi oryn úshin segiz kásibı ujym básekege tústi. Qatysýshylar horǵa óńdelgen qazaqtyń halyq ánderin, shetel kompozıtorlarynyń horǵa arnalǵan shyǵarmalary men B.Baıqadamovtyń horǵa arnalǵan shyǵarmalaryn «a kapello» túrinde oryndady.
Sol sııaqty, ekinshi orynnan tabylǵan Isa Baızaqov atyndaǵy Pavlodar oblystyq fılarmonııasynyń kameralyq hory da tyńdarmandardyń yqylasyna bólendi. «Oqý oryndarynyń hor ujymdary» kategorııasy boıynsha birinshi oryn Qurmanǵazy atyndaǵy Qazaq ulttyq konservatorııasynyń aralas hory jáne P.Chaıkovskıı atyndaǵy Almaty mýzykalyq kolledjiniń «Alataý» jastar horyna berildi. Orta bilim beretin oqý oryndarynyń ishinen N.Tilendıev atyndaǵy Kishi óner akademııasynyń «Erkem-aı» hor ujymy top jardy.
Bazarǵalı Jamanbaev tóraǵalyq etken qazylar alqasynyń quramynda B.Baıqadamovtyń qyzy Baldyrǵan Baıqadamova da boldy.
Saltanatty marapattaý sáti kezinde óner sańlaǵynyń úsh birdeı qyzy – Alýa, Aıgúl jáne Baldyrǵan Baıqadamovalar sahnaǵa shyǵyp, baıqaýdy uıymdastyrýshylar men qatysýshylarǵa shynaıy alǵystaryn bildirdi.
– Hor ujymdarynyń baıqaýyn ótkizý ońaı emes. Mundaı óner ujymdarynda 20-dan bastap 80 ánshige deıin bolady. Al sońǵy jyldary Mádenıet jáne aqparat mınıstrligi kásibı deńgeıi joǵary, uıymdastyrylýy kúrdeli sharalarǵa muryndyq bolyp, urpaǵymyzdy estetıkalyq jáne patrıottyq rýhta tárbıeleýge ólsheýsiz úles qosyp keledi. Qazaq óneriniń órleýine ólsheýsiz eńbek sińirgen ákemizdiń atyn óshirmegen Baıqadamov baıqaýy óz úzdikterin ári qaraı da anyqtap, hor janrynyń dańqyn asyra bersin, – dedi kompozıtordyń urpaqtary.
Aınash ESALI,
«Egemen Qazaqstan».
ALMATY.
––––––––––––
Sýrette: Baldyrǵan, Aıgúl, Alýa Baıqadamovalar.