Senatorlar koronavırýspen syrqattaný qaıta órshigen jaǵdaıda óńirlerdiń dári-dármekpen qanshalyqty qamtamasyz etilgenin tekserýde, dep habarlaıdy Egemen.kz QR Parlamenti Senatynyń Baspasóz qyzmeti taratqan aqparatqa súıene otyryp.
Senat depýtattary Nurlan Beknazarov pen Aıgúl Qapbarova Shymkent qalasyna baryp, sıtýasııalyq shtabta bolyp, Densaýlyq saqtaý vıse-mınıstriniń qatysýymen ótken aımaqtaǵy epıdemıologııalyq ahýal máseleleri jónindegi keńeske qatysty.
Shymkentte KVI juqtyrýdyń 5 myńnan astam jaǵdaıy tirkelgen. Biraq aýrý deńgeıi tómendeýde, búginge deıin 4 285 pasıent emdelip, úılerineoraldy. Qalalyq densaýlyq saqtaý mamandary pnevmonııa týraly málimetterdi de habarlady: jyl basynan beri 15 300-den astam jaǵdaı tirkelgen, 11 620 naýqas saýyǵyp shyqqan. Jergilikti stasıonarlar qazirgi ýaqytta tek 16 paıyzǵa ǵana tolyq. Ákimdik koronavırýspen jáne pnevmonııamen aýyratyn naýqastardy qabyldaý jáne emdeý úshin 3 myńǵa jýyq tósek oryn jasaqtaǵan.
Shtab otyrysynda senatorlar men densaýlyq saqtaý ókilderi pandemııamen odan ári kúres sharalaryn talqylady. Qalalyq densaýlyq saqtaý mamandary epıdemııa qaıtalanǵan jaǵdaıda Shymkenttiń barlyq medısınalyq mekemeleri eki aılyq dári-dármek qorymen qamtamasyz etilgenin aıtty. Sonymen qatar, dárigerlerdiń biliktiligin arttyrý maqsatynda arnaıy semınarlar men basqa da profılaktıkalyq is-sharalar ótkizilip keledi. Qala boıynsha 211 mobıldi brıgada qurylyp, olar qazirdiń ózinde 22 myńnan astam naýqasqa úıde kómek kórsetip úlgergenin aıtqan jón.
Senatorlar jergilikti atqarýshy organdarǵa sanıtarlyq talaptardy saqtaý jáne pandemııamen kúreste aldyńǵy shepte júrgen dárigerlerdi kótermeleý qajettiligi týraly eske saldy. Depýtattar dárigerlerge koronavırýspen kúreste tabandylyq pen batyldyq tanytqany úshin alǵys bildirdi. Sondaı-aq, sapar barysynda senatorlar aýrýhanalarǵa, dárihanalarǵa jáne jedel járdem stansııasyna bardy.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.