Fýtboldan Chempıondar lıgasynyń shırek fınal matchtary aıaqtalyp, jartylaı fınalǵa shyqqan komandalar belgili boldy.
Pandemııaǵa baılanysty týrnırdiń keıbir ejelerine ózgeris engizilýi keı komandalarǵa óz paıdasyn tıgizip jatyr. Bir matchtan turatyn oıynnyń arqasynda ekinshi deńgeıde qalyp qoıǵan klýbtar baryn salyp, kishigirim sensasııa tirkep jatyr. Máselen, shırek fınalda Germanııanyń «RB Leıpsıg» klýby jyl saıyn Eýrokýbok básekeleriniń fınalynda óner kórsetip kelgen Ispanııanyń «Atletıko» komandasyn 2:1 esebimen jeńip ketse, shırek fınalda Ronaldý bastaǵan «Iýventýsty» týrnırden shyǵaryp jibergen Fransııanyń «Lıon» komandasy aǵylshynnyń azýly ujymy «Manchester Sıtıden» 3:1 nátıjesimen basym tústi.
Sondaı-aq jartylaı fınalǵa «Barselonany» 8:2 esebimen jeńgen «Bavarııa» men «Atalantadan» sońǵy mınýtta jeńisti julyp alǵan PSJ klýby joldama aldy. Osylaısha ½ fınalda Germanııa men Fransııanyń eki-eki komandasy óner kórsetetin boldy. Jartylaı fınaldaǵy PSJ jáne «RB Leıpsıg» arasyndaǵy match tamyzdyń 18-nen 19-na qaraǵan túni, al «Bavarııa» men «Lıon» arasyndaǵy kezdesý 19-nan 20-na qaraǵan túni ótedi. Fınal 23 tamyzǵa josparlanǵan.