Memleket basshysy Qasym-Jomart Toqaev sybaılas jemqorlyqqa qarsy kúres máseleleri jóninde ótkizgen keńeste kásipkerlik salasyna da toqtaldy, dep habarlaıdy Egemen.kz.
Prezıdent sońǵy bes jyl ishinde qylmystyq ister boıynsha zańdy tulǵalarǵa kedergi keltirgeni úshin 11 adam, reıderlik ister boıynsha - 7 adam sottalǵanyn aıtty.
"Bul sandar bıznesti qorǵaýdyń quqyq qorǵaý boıynsha tetikteri quldyrap bara jatqanyn kórsetedi.Sonymen birge, men byltyrǵy Joldaýymda zańdy kásipkerlikke kedergi jasaý - memlekettiń aýyr qylmysy dep aıtqan bolatynmyn. Muny barlyq quqyq qorǵaý organdary, sonyń ishinde Bas prokýratýra da este saqtaýy kerek", - dedi Qasym-Jomart Toqaev.
Úkimetke Bas prokýratýramen birge bir aı ishinde kóterilgen barlyq máseleler boıynsha naqty usynystar engizý tapsyrylǵanyn atap ótken Memleket basshysy bul salada belgili bir oń úrdister bar ekenin de jasyrmady.
"Biz engizgen sybaılas jemqorlyqqa qarsy qoldaý ınstıtýty alǵashqy jemisin berýde. Tek osy jyldyń birinshi jartyjyldyǵynda 510 bıznes-joba boıynsha 114 zańsyz aralasý faktisi anyqtaldy. Bul jumysty jalǵastyrý qajet. Bas prokýratýra kásipkerlerdi qylmystyq qýdalaý orbıtasyna negizsiz tartý faktilerin dereý boldyrmaýǵa mindetti. Kásipkerler men ınvestorlar sybaılas jemqorlyq qysymynan qorǵanys baryn sezinýi kerek", dedi Prezıdent.