Ulttyq kınony qoldaý memlekettik ortalyǵy tóraǵasynyń birinshi orynbasary bolyp Ernar Qurmashev taǵaıyndaldy, - dep habarlaıdy Egemen.kz.
Ernar Qurmashev 2019 jyldyń qyrkúıeginen bastap Almaty mádenıet basqarmasynyń basshysy qyzmetin atqardy. Ol megapolıstiń kreatıvti ekonomıkasyn damytý strategııasyn ázirleýge jáne engizýge jaýap bergen edi.
"Meniń oıymsha, qazaqstandyq kınematografııa men anımasııanyń bolashaǵy zor. Olar lokomotıv retinde búkil eldiń kreatıvti ekonomıkasyn jyljytatyn negizgi salalar. Kıno ádebıet, keskindeme, mýzyka, sán, zamanaýı, atqarýshy jáne qolóner sııaqty shyǵarmashylyq salalardy biriktiredi. Otandyq kıno jáne anımasııalyq ındýstrııalardyń damýy IT-salasyna da oń áserin tıgizýde. Men otandyq kórermenderge de, shetelde de qyzyqty bolatyn sapaly, qyzyqty jobalar jasaý úshin ózimniń barlyq tájirıbem men quzyrettilikterimdi qoldanǵym keledi", - dedi Ernar Qurmashev.
Ernar Qurmashev 1984 jyly 18 jeltoqsanda dúnıege kelgen. Sátbaev atyndaǵy QazUTÝ-dy bitirip, New York Film Academy-da taǵylymdamadan ótken.
Aıta keteıik, Ulttyq kınony qoldaý memlekettik ortalyǵy 2019 jyldyń 15 naýryzynda quryldy. Onyń negizgi mindetteri - ulttyq múddelerge sáıkes keletin kınojobalardy qarjylandyrý jáne monıtorıngileý, otandyq kınematografııany qoldaý, onyń básekege qabilettiligin arttyrý, kıno salasyna ınvestısııalar tartý.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.