Germanııanyń «Bavarııa» komandasy Fransııanyń PSJ klýbynan 1:0 esebimen basym túsip, Chempıondar lıgasynyń jeńimpazy atandy, dep habarlaıdy Egemen.kz.
Birinshi taımda qos komanda alma-kezek shabýyldarmen almasty. Oıynnyń alǵashqy 45 mınýtynda «Bavarııa» shabýylshysy Levandovskıde gol soǵatyn úsh múmkindik boldy. Tepken doby birde qaqpa baǵanyna tıse, birde qaqpashy soqqyny qaıtaryp otyrdy. Bul keshte PSJ shabýylshylary – Neımar men Mbappe de birneshe múmkindikti jiberip aldy.
Al ekinshi taım jurt kútkendeı bolmady. Eki ujym da «ıtjyǵys» oıyn órnegin kórsetti. Tártip buzý da, sary qaǵaz da, aıqaı-shý da kóp boldy.
Áıtkenmen, oıynnyń 59 mınýtynda «Bavarııa» qorǵaýshysy Kımmıhtiń oń qaptaldan asyrǵan dobyn baspen qaqpa buryshyna dál kózdegen Komannyń qanjyǵasy maılandy.
Osy goldan keıin qanshama alma-kezek shabýyl jasalǵanymen esep ózgergen joq.
«Bavarııa» Chempıondar lıgasynyń alty dúrkin jeńimpazy atanyp, bul kórsetkish boıynsha «Lıverpýlmen» teńesti. Chempıondar lıgasyn eń kóp jeńip alǵan komanda – «Real Madrıd». Olar atalmysh kýbokty 13 ret basyna kótergen. Ekinshi orynda jeti márte jeńiske jetken «Mılan» klýby.
Statıstıka:
PSJ – «Bavarııa» 0:1
Gol soqqan – Koman 59.
Dopty ıelik etý – 39% – 61%; soqqy – 8:12; dál soqqy – 3:2; buryshtama – 4:4; ofsaıd – 2:1; sary qaǵaz – 4:4; oıynshy almastyrý – 4:4.
PSJ: qaqpashy – Navas; qorǵaýshylar – Bernat (Kýrzava 80), Kımpembe, Sılva (k), Kerer; jartylaı qorǵaýshylar – Paredes (Verrattı 65), Markınos, Errera (Draksler 72); shabýylshylar – Neımar, Mbappe, Dı Marııa (Shýpo-Motın 80).
«Bavarııa»: qaqpashy – Noıer (k); qorǵaýshylar – Kımmıh, Boateng (Zıýle 25), Alaba, Devıs; jartylaı qorǵaýshylar – Alkantara (Tolısso 86), Goretska, Gnabrı (Koýtıno 68), Koman (Perıshıch 68); shabýylshylar – Mıýller, Levandovskı.