Bıyl Nur-Sultan qalasynda 12 mektep salynady, 26 bilim berý nysany jóndelip, ınklıýzıvti bilim berý kabınetteri ashylady. Bul týraly "Tamyz" keńesiniń onlaın otyrysynda elorda ákimi Altaı Kólginov málimdedi, dep habarlaıdy Egemen.kz
"Eger byltyr ınklıýzıvti bilimmen qamtý 80% bolsa, bıyl biz bul kórsetkishti 100% deńgeıge jetkizýdi josparlap otyrmyz. Tuńǵysh Prezıdent – Elbasy Qorynyń bastamasymen eki jańa mekteptiń negizinde 1 qyrkúıekke deıin 30 oryndyq 2 ınklıýzıvti qoldaý bólmeleri ashylady. Shildeden Asyl Mıras kabıneti jumys isteı bastady, onda halyqaralyq sertıfıkatqa ıe jáne zamanaýı ádistemelerdi meńgergen mamandar jumys isteıdi. Sondaı-aq, qyrkúıek aıynda zııatkerlik qabileti tómen 100 balaǵa arnalǵan №3 arnaıy mektep ashýdy josparlap otyrmyz, kúzde kórý qabileti nashar balalarǵa arnalǵan balabaqsha ashamyz", dedi elorda ákimi Altaı Kólginov.
Sondaı-aq jańa oqý jylynda elordalyq mektepterde qosymsha bilim berýdiń 8 fılıaly jáne taǵy 2 qoǵamdyq ortalyq ashylady. Sonymen qatar, jańa nysandardyń birinshi qabatynda áleýmettik nysandar ashylýda: balalarǵa arnalǵan shaǵyn ortalyqtar, ońaltý ortalyqtary, balabaqshalar, medısınalyq nysandar jáne taǵy basqalary.
Jalpy, bıyl byltyrǵyǵa qaraǵanda eki ese kóp mektep salynady. Bul 12 mektep, 2021 jyly da osy mólsherde salynady. Bul sharalar júktemeni aıtarlyqtaı azaıtady. Sonymen qatar, bıyl 26 bilim berý nysany (mektepter, balabaqshalar, kolledjder) jóndeledi.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.