Jaqynda "Janýarlar – meniń dostarym!" respýblıkalyq baıqaýynyń jeńimpazdary anyqtalǵan bolatyn, dep habarlaıdy Egemen.kz
Edu Stream kompanııasynyń Youtube arnasy arqyly onlaın-rejimmen ótken marapattaý rásiminde Bala quqyǵy jónindegi ýákiletti ókil Arýjan Saıyn Parlament Senatynyń tóraǵasy Máýlen Áshimbaevtyń quttyqtaý hatyn oqyp berdi.
Sáýir men shilde aralyǵynda ótken baıqaýǵa elimizdiń túkpir-túkpirinen tórt myńnan astam bala qatysqan. Nátıjesinde, Bas júldege almatylyq Marııa Ivanıchenko (15 jas) laıyq dep tabylsa, al 6-8 jas toby boıynsha óskemendik Polına Zonova (8 jas), 9-11 jas aralyǵyndaǵy balalar tobynan soltústikqazaqstandyq Eldos Jangeldi (10 jas), 12-14 jastaǵy jetkinshekter arasynan oraldyq Dana Kýrak (14 jas), 15 pen 17 jas aralyǵyndaǵy ónerpazdardan nur-sultandyq Alına Baıbosynova (15 jas) birinshi oryndy ıelendi.
Bas júlde ıegeri Marııa Ivanıchenkoǵa baıqaýdyń bas demeýshisi Edu Stream kompanııasy tarapynan Avstrııaǵa joldama jáne Apple iPad tabystaldy. Sonymen qatar birinshi oryn ıegerlerine de Avstrııaǵa sapar sertıfıkaty berildi. Jeńimpazdarǵa "Tehnodom", "Nastoıashıı Býratıno" kompanııalarynan smartfon, samokat jáne basqa qundy syılyqtar tabys etildi. О́ner dodasyna qatysýshylardy Ishki ister mınıstrligi, LIKEE ǵalamdyq platformasy, "Dobrovolnoe obshestvo" Mıloserdıe" qoǵamdyq qory, Animal Security qoǵamdyq qory, "Belyı bım" janýarlardy qorǵaý mekemesi yntalandyrý syılyqtarymen marapattady.
Onlaın-jobada jeńimpazdar janýarlarǵa súıispenshiligin jetkizip, alǵa qoıǵan maqsat-murattarymen bólisti. Mysaly, birinshi oryn ıelengen Eldos Jangeldi grattaj tehnıkasymen sýret salǵandy unatatynyn, báıgege qatysýyna áleýmettik jeliden balalardyń ıtti órtegeni jaıly oqyǵan aqparaty sebep bolǵanyn tilge tıek etse, 2-oryn ıelengen túrkistandyq sýretshi Jasýrbek Karchıev: "Men úshin bul kútpegen jańalyq boldy. Onlaın-quttyqtaý tamasha ótti, demeýshilerge, uıymdastyrýshylarǵa raqmet aıtamyn", dedi.
Sondaı-aq jas sýretshi ótken jyly respýblıkalyq sýret baıqaýyna qatysyp, Bas júldeni jeńip alǵanyn, kóshede qaraýsyz qalǵan ıttiń sýretin salý ıdeıasy úı janýarlary týraly fılmdi kórip otyrǵanda týǵanyn aıtty.
Edu Stream kompanııasynan Avstrııaǵa sertıfıkat alǵan jeńimpazdar karantınnen keıin óz eńbekterin Venada ótetin kórmede pash etpek. Al konkýrsqa qatysqan bir top balanyń sýreti qala kóshelerindegi bılbordqa ilinedi.
Baıqaýdyń maqsat-muraty – tabıǵatqa, qorshaǵan ortaǵa, janýarlarǵa degen súıispenshilikti óskeleń urpaq sanasyna sińdirý. Uıymdastyrýshylar mundaı is-sharalardyń tárbıelik máni zor dep esepteıdi. Elshi-ambassador Dıana Gamazova janýarlardy qorǵaý maqsatynda zańda qarastyrylǵan normalardy qatańdatý, ıesiz qalǵan úı janýarlaryna jaǵdaı jasaý jáne ıtterdi balanyń kózinshe aýlamaý sııaqty usynystardy alǵa tartty. Al ádil qazylar alqasynyń múshesi T. Júrgenov atyndaǵy QUО́A Beıneleý óneriniń tarıhy men teorııasy kafedrasynyń professory Olga Batýrına mektepte álemdik beıneleý óneriniń tarıhy jaıly sabaqty qaıta jandandyrýdy usyndy.
Aıta ketý kerek, baıqaý Qazaqstan Prezıdentiniń qamqorlyǵymen, BUU qorshaǵan ortany qorǵaý baǵdarlamasynyń Dúnıejúzilik qorshaǵan ortany qorǵaý kúni aıasynda, Bilim jáne ǵylym, Mádenıet jáne sport mınıstrlikteriniń qoldaýymen, "Balalar Álemdi Beıneleıdi" Qoǵamdyq Qory, bas seriktes Edu Stream kompanııasynyń jáne "Tehnodom" men "Nastoıashıı Býratıno" seriktesteriniń qatysýymen ótken edi.