Grýzııanyń qazirgi is ústindegi prezıdenti Mıhaıl Saakashvılı eldi tastap shyqty. Dúısenbiden seısenbige qaraǵan túni ol ushaqpen Brıýsseldi betke aldy. Bul týraly «Rýstavı-2» telearnasy habarlady.
Gúrjistan basshysy ultqa qoshtasý úndeýin oqyp bergen boıda ushyp ketti. Osy jáıt el ishinde kóp qaýeset týǵyzyp úlgerdi. Sonyń bári onyń Tbılısıge endi qaıtyp kelmeıtini týrasynda órbidi. Alaıda, qarashanyń basynda ınaýgýrasııa ótkenge deıin formaldy túrde eldiń prezıdenti bolyp qala beretin Mıshıko Saakashvılı bul alyp-qashty áńgimelerdiń negizsiz ekenin aıtty.
«Men ózimniń Eýroodaqqa baryp-shyǵýymdy nyshandyq nárse dep bilemin. Munda kelgende elde keshe ótken saılaýdaǵy ózimniń ustanǵan baǵytymdy jetkizbek boldym. Eger Grýzııa aldaǵy ýaqytta durys baǵytta júrmeıtin bolsa, jaǵdaı nasharlaıdy. Meni tek ózimizdiń el úshin biraz nárseni istep úlgergenimiz qýandyrady», - dedi ol.
Aıta keteıik, Saakashvılıdiń saıası qarsylasy Georgıı Margvelashvılı prezıdent saılaýynda jeńiske jetkenge deıin-aq Grýzııada burynǵy prezıdentke qatysty qylmystyq is qozǵalatyny aıtylyp júrgen edi. Atap aıtqanda, áńgime premer-mınıstr Zýrab Jvanııanyń 2005 jylǵy aqpandaǵy ólimine qatysty jaılar qaıta tekserýden ótilmek. Al qazir Grýzııada bılikti aýystyrý qazirdiń ózinde qyzý bastalyp ketti. Seısenbi kúni eldiń bes oblysyndaǵy gýbernatorlar almasty. Sol sııaqty Saakashvılıdiń kezinde shet el asyp ketken birqatar oppozısııa músheleri qaıta oralatyndaryn bildirdi.
Sáken Maılybaı.