Ulttyq bank tóraǵasy Erbolat Dosaev Úkimet otyrysynda Memleket basshysynyń joldaýyn iske asyrý boıynsha qandaı sharalar qabyldanatynyn aıtty, dep habarlaıdy Egemen.kz.
Dosaevtyń habarlaýynsha, Prezıdenttiń buǵan deıin bergen tapsyrmasyna sáıkes, aqsha-kredıt saıasatynyń 2030 jylǵa deıingi strategııasy ázirlenýde. Ol eldiń 2025 jylǵa deıingi jańartylǵan Strategııalyq damý jospary qabyldanǵannan keıin bekitilmek.
"Aqsha-kredıt saıasatyn iske asyrýdyń tıimdiligin arttyrý jáne valıýta naryǵyn turaqtandyrý úshin Úkimetpen birlesip, valıýtalyq túsimdi elge qaıtarýǵa arnalǵan qosymsha sharalar pysyqtalady jáne eksporttaýshylardyń ony iske asyrýy úshin qolaıly jaǵdaılar jasalady.
Aqsha-kredıt saıasatynyń 2030 jylǵa deıingi strategııasynda Ulttyq bank janynda Aqsha-kredıt saıasaty jónindegi komıtet qurý eskeriledi, onyń basty mindeti – bazalyq stavka men onyń dáliziniń mólsheri boıynsha strategııalyq sheshimder qabyldaý. Orta merzimdi perspektıvada oǵan táýelsiz músheler kiredi. Zańnamalyq aktilerge tıisti ózgerister 2020 jyldyń sońyna deıin engiziletin bolady", - dedi ol.
Sondaı-aq, ekonomıkalyq ósýdi qalpyna keltirý maqsatynda daǵdarys saldarynan aıtarlyqtaı zardap shekken sektorlardaǵy kásiporyndardy qoldaý úshin qosymsha 200 mlrd teńge bólinedi.
"Salalar tizbesin Úkimet "Atameken" UKP-men birlesip anyqtaıtyn bolady. Ulttyq banktiń jeńildikpen kredıtteý baǵdarlamasy 800 mlrd teńgege deıin jetkizilip, 2021 jyldyń sońyna deıin uzartylady", - dedi Ulttyq bank basshysy.