Issaparmen óńirlerde júrgen Densaýlyq saqtaý mınıstri Alekseı Soı Almaty oblysyna baryp, Erkin aýylyndaǵy turǵyndarǵa arnap salynyp jatqan dárigerlik ambýlatorııanyń qurylysymen tanysty. Medısınalyq nysan bir aýysymda 100 kelýshini qabyldaı alady. Medısınalyq-sanıtarlyq alǵashqy kómek kórsetetin mekemeniń aýmaǵy 1100 sharshy metr jáne 14 500 adamǵa arnalǵan, - dep habarlaıdy Egemen.kz mınıstrliktiń baspasóz qyzmetine silteme jasap.
Budan keıin Densaýlyq saqtaý mınıstri 13 modýldik juqpaly aýrýlar aýrýhanasynyń biriniń qurylys alańyna bardy.
"Memleket basshysy Qasym-Jomart Toqaev Qazaqstan halqyna Joldaýynda 13 jańa juqpaly aýrýlar aýrýhanasyn salý mindetin qoıdy. Qazirgi ýaqytta óńirlerde ákimdikter 12 modýldik ınfeksııalyq aýrýhana qurylysynyń jáne bıyl qazan aıynda paıdalanýǵa beriletin bir aýrýhanany qaıta jańartýǵa kiristi. Bul pandemııanyń yqtımal ekinshi tolqynyna daıyndyq jáne halyqty ýaqtyly, sapaly kómekpen qamtamasyz etýge múmkindik beredi. Osylaısha, qosymsha 2 700 ınfeksııalyq tósek-oryn ashylady", - dedi A.Soı.
Almaty oblysy Densaýlyq saqtaý basqarmasynyń basshysy О́mirzaq Nııazbekovtyń aıtýynsha, medısınalyq mekeme segiz bólimnen turady jáne bıyl qazan aıynda paıdalanýǵa beriledi. Aýrýhana 200 tósek-orynǵa arnalǵan, munda 400-den astam adam jumys isteıdi.
Densaýlyq saqtaý basqarmasy basshysynyń málimetinshe, búgingi tańda ınfeksııalyq tósek sany 520-dan 180-ge deıin, al provızorlyq tósek-oryn sany 3 560-tan 707-ge deıin qysqardy. Oblysta koronavırýs ınfeksııasy anyqtalǵan adamdarǵa arnalǵan 100 reanımasııalyq tósek bar. Aýrýhanalarda 303 О́JJ apparaty bar, 15 qyrkúıekke qaraı olardyń sany 507 birlikke jetedi. Medısınalyq uıymdarda 634 ottegi konsentratory bar, jergilikti bıýdjet esebinen taǵy 100 dana jáne demeýshilik kómek esebinen 90 dana satyp alý rásimi júrgizilýde.
Medısınalyq uıymdarǵa ottegi stansııasyn jáne 15 rentgen apparatyn ornatý úshin jergilikti bıýdjetten qosymsha 763 mln teńge bólinedi. Medısınalyq uıymdarda dári-dármek pen dezınfeksııalyq quraldardyń qory jetkilikti. О́ńirdegi ınfeksııalyq jáne provızorlyq stasıonarlarda 215 150 antıpıretıkalyq, 45 535 vırýsqa qarsy preparat, sondaı-aq 255 157 antıbıotık bar.
Aımaqta 8 PTR-zerthana jumys isteıdi. Oblystyq veterınarııalyq qyzmettiń PTR-zerthanasynyń potensıalyn paıdalaný arqyly jáne 1 tamyzdan bastap jeke menshik zerthanalarmen jasalǵan shart esebinen testileý kólemi táýligine 3 myńǵa deıin artady.
A. Soı issapar sońynda Taldyqorǵan qalasyndaǵy kópbeıindi aýrýhana bazasynda bıyl shilde aıynda ashylǵan COVID -ortalyǵynyń jumysymen tanysty. COVID-ortalyǵynyń mamandary aýyr jáne óte aýyr jaǵdaıdaǵy naýqastarǵa keńes beredi, olardy emdeýdiń ádisterin qarastyrady.